പാലക്കാട് : പാലക്കാട്ടെ സിപിഐഎം പ്രവര്ത്തകന് ഷാജഹാന്റെ കൊലപാതകത്തില് പോലീസ് കസ്റ്റഡിയിലെടുത്ത യുവാക്കളെ കാണാനില്ലെന്ന് പരാതി. പോലീസ് കസ്റ്റഡിയിലെടുത്ത ജയരാജിന്റെ അമ്മ ദേവയാനി, ആവാസിന്റെ അമ്മ പുഷ്പ എന്നിവരാണ് പരാതിയുമായി കോടതിയെ സമീപിച്ചത്. സംഭവത്തില് കോടതി അന്വേഷണ കമ്മിഷനെ നിയോഗിച്ചു. അഭിഭാഷക കമ്മിഷന് ശ്രീരാജ് വള്ളിയോട് പാലക്കാട് സൗത്ത് പോലീസ് സ്റ്റേഷനില് പരിശോധന നടത്തുകയാണ്.
ഷാജഹാന് വധക്കേസില് പ്രതിപ്പട്ടികയിലുള്ളവരല്ലാതെ പലരും പോലീസ് കസ്റ്റഡിയിലുണ്ട്. കൊലപാതകത്തിന് ശേഷം പ്രതികള് മൂന്ന് സംഘങ്ങളായി മലമ്പുഴ കവക്കടുത്തും പൊള്ളാച്ചിയിലും ഒളിവില് കഴിഞ്ഞു വരികയായിരുന്നു. എട്ടംഗ സംഘമാണ് കൊലപാതകം നടത്തിയത്.
ഇതില് രണ്ട് പേര് ഷാജഹാനെ വെട്ടി വീഴ്ത്തുകയായിരുന്നു. ആദ്യം കാലിലും പിന്നീട് കൈക്കും വെട്ടിയ പ്രതികള് ഷാജഹാന് വീണതോടെ കഴുത്തിലും തലയിലും ക്രൂരമായി വെട്ടി. കൊലപ്പെടുത്തുക എന്ന ലക്ഷ്യത്തോടെയാണ് പ്രതികള് ഷാജഹാനെ അക്രമിച്ചതെന്നാണ് പോലീസ് നല്കുന്ന വിവരം.
