ശ്രീകൃഷ്ണപുരം : തെരുവുനായ്ക്കളെ കൊല്ലാനായി സ്ഥാപിച്ച വൈദ്യുതി കെണിയില് തട്ടി ഷോക്കേറ്റ് ഒരാള് മരിച്ചു. കുറുവട്ടൂര് ഇടുപടിക്കല് സഹജന് (54) ആണു മരിച്ചത്. കഴിഞ്ഞ ദിവസം വൈകിട്ട് ആറരയോടെയാണു സംഭവം. മരണവുമായി ബന്ധപ്പെട്ട് സഹജന്റെ സഹോദരങ്ങളുടെ മക്കളായ ഇടുപടിക്കല് രാജേഷ് (31), പ്രമോദ് (19), പ്രവീണ് (25) എന്നിവരെ പോലീസ് അറസ്റ്റ് ചെയ്തു. വീട്ടുവളപ്പില്നിന്നു ഷോക്കേറ്റ സഹജനെ പെരിന്തല്മണ്ണയിലെ സ്വകാര്യ ആശുപത്രിയില് എത്തിച്ചെങ്കിലും ജീവന് രക്ഷിക്കാന് കഴിഞ്ഞില്ല. സഹജനും സഹോദരന്മാരും ഒരേ വളപ്പിലെ വീടുകളിലാണു താമസം.
വീട്ടുവളപ്പില് തെരുവു നായ്ക്കളെ കൊല്ലുന്നതിനായി സഹോദര പുത്രന്മാര് ചേര്ന്നൊരുക്കിയ കെണിയില്പ്പെട്ടാണ് ഷോക്കേറ്റതെന്ന് ശ്രീകൃഷ്ണപുരം പോലീസ് ഇന്സ്പെക്ടര് കെ.എം ബിനീഷ് പറഞ്ഞു. സമീപത്തെ വൈദ്യുതി ലൈനില്നിന്നാണ് കെണിയിലേക്ക് വൈദ്യുതി പ്രവഹിപ്പിച്ചത്. പ്രതികളെ ഇന്ന് കോടതിയില് ഹാജരാക്കും.