തിരുവല്ല : സിപിഎം പെരിങ്ങര ലോക്കല് കമ്മറ്റി സെക്രട്ടറി സന്ദീപിനെ കൊലപ്പെടുത്തിയ കേസില് മൂന്നു പ്രതികള് പിടിയില്. ചാത്തങ്കരി കണിയാംപറമ്പില് ജിഷ്ണു (23), ചങ്ങനാശേരി പായിപ്പാട് പള്ളിക്കച്ചിറ കൊച്ചുപറമ്പില് പ്രമോദ് (23), കാവുംഭാഗം വേങ്ങല് നന്ദു ഭവനില് നന്ദു (24) എന്നിവരാണ് പിടിയിലായത്.
കണ്ണൂര് സ്വദേശി നിജാസിനെയും മറ്റൊരാളെയും പിടികിട്ടാനുണ്ട്. മുഖ്യപ്രതി ജിഷ്ണു ആര്എസ്എസിന്റെ പ്രവര്ത്തകനാണ്. പ്രമോദ്, നന്ദു, നിജാസ് എന്നിവര് ഡിവൈഎഫ്ഐ പ്രവര്ത്തകരാണെന്ന് പറയുന്നു. സംഭവശേഷം ബൈക്കില് രക്ഷപ്പെട്ട പ്രതികളെ ഇന്നു പുലര്ച്ചെയോടെ മൊബൈല് ടവര് ലൊക്കേഷന് നോക്കി ആലപ്പുഴ കരുവാറ്റിയില് നിന്നാണ്ടി പികൂടിയത്.
ഇന്നലെ രാത്രി എട്ടുമണിയോടെ ചാത്തങ്കരിയില് ഡോ. ജോസഫ് മണക്കിന്റെ വീടിന് സമീപമുള്ള ആദ്യത്തെ കലുങ്കില് വച്ചാണ് സന്ദീപിനെ കുത്തിക്കൊലപ്പെടുത്തിയത്. രണ്ടു ബൈക്കുകളിലായി എത്തിയ അഞ്ചംഗ സംഘമാണ് കൃത്യം നടത്തിയത്. കൃത്യം നടത്തുന്നതിന് മുന്പ് സന്ദീപ് കലുങ്കില് ഇരിക്കുന്നതായി പ്രതികള് സമീപത്തെ മാടക്കടയില് ചെന്ന് ഉറപ്പു വരുത്തിയിരുന്നു. സാധാരണ രാത്രി 9.30 വരെ സന്ദീപും കൂട്ടുകാരും ഈ കലുങ്കില് വന്നിരിക്കാറുണ്ട്.
സംഭവത്തിന് ശേഷം ആദ്യം അവിടെയെത്തിയ രാകേഷ് എന്ന ചെറുപ്പക്കാരനെ കൊലയാളി സംഘം തടഞ്ഞിരുന്നു. സന്ദീപിനെ കുത്തി വീഴ്ത്തിയ ശേഷം ജിഷ്ണുവിന്റെ നേതൃത്വത്തിലുള്ള സംഘം അവിടെ നില്ക്കുമ്പോഴാണ് രാജേഷ് അവിടെ എത്തിയത്. സന്ദീപിനെ ഞങ്ങള് കുത്തി കണ്ടത്തിലിട്ടിട്ടുണ്ട് എന്നായിരുന്നു ജിഷ്ണു പറഞ്ഞത്. രാജേഷിനെ വടിവാള് കാണിച്ച് ഭീഷണിപ്പെടുത്തുകയും ചെയ്തു.
