പാലക്കാട് : പാലക്കാട് ആര്എസ്എസ് മണ്ഡല് ബൗദ്ധിഖ് പ്രമുഖ് ആയിരുന്ന സഞ്ജിത്തിനെ എസ്ഡിപിഐ തീവ്രവാദികള് സംഘം ചേര്ന്ന് കൊലപ്പെടുത്തിയ സംഭവത്തില് പ്രതികളുടെ വിവരങ്ങള് പുറത്തുവിട്ട് പോലീസ്. കേസില് മൂന്നാം പ്രതിയും അറസ്റ്റിലായതിന് പിന്നാലെയാണ് കേസുമായി ബന്ധപ്പെട്ട വിവരങ്ങള് പുറത്തുവിട്ടത്. മൂന്ന് പേരും പോപ്പുലര് ഫ്രണ്ട് നേതാക്കളാണെന്ന് പാലക്കാട് എസ്പി ആര് വിശ്വനാഥ് അറിയിച്ചു.
ഒറ്റപ്പാലം ചുനങ്ങാട് സ്വദേശി നിസാറാണ് അറസ്റ്റിലായത്. കൊലപാതകത്തിന് ശേഷം അഞ്ചംഗ സംഘത്തിന് ഒളിവില് കഴിയാനും രക്ഷപ്പെടാനും സഹായിച്ചത് ഇയാളാണ്. ഗൂഢാലോചന, പ്രതികളെ രക്ഷപ്പെടാന് സഹായിച്ചു എന്നീ കുറ്റങ്ങള് ചുമത്തിയാണ് ഇയാള്ക്കെതിരെ കേസെടുത്തത്. പ്രതികള് രക്ഷപ്പെട്ട ഓട്ടോറിക്ഷയും പോലീസ് കസ്റ്റഡിയില് എടുത്തിട്ടുണ്ട്.
അറസ്റ്റിലായ മറ്റു രണ്ടു പോപ്പുലര് ഫ്രണ്ട് നേതാക്കളുടെ പേരുവിവരങ്ങളും പോലീസ് പുറത്തുവിട്ടിട്ടുണ്ട്. നെന്മാറ അടിപ്പരണ്ട സ്വദേശി അബ്ദുള് സലാം, കൊഴിഞ്ഞാമ്പാറ സ്വദേശി ജാഫര് എന്നിവരെ നേരത്തെ അറസ്റ്റ് ചെയ്തിരുന്നു. അബ്ദുള് സലാമാണ് കേസിലെ ഒന്നാം പ്രതി. കൊലപാതക സംഘത്തിന്റെ വാഹനം ഓടിച്ചത് ഇയാളാണ്. സഞ്ജിത്തിനെ വെട്ടിയ ഒരാള് ജാഫറാണ്.
കേസില് 5 പേരെ കൂടി അറസ്റ്റ് ചെയ്യാനുണ്ടെന്ന് പോലീസ് അറിയിച്ചു. ആര്എസ്എസ് പ്രവര്ത്തകന് കൊല്ലപ്പെട്ടിട്ട് പതിനേഴ് ദിവസത്തിന് ശേഷമാണ് പോലീസ് വിവരങ്ങള് പുറത്തുവിടുന്നത്. സര്ക്കാരിനെയും പോപ്പുലര് ഫ്രണ്ടിനെയും സഹായിക്കാനുള്ള പോലീസിന്റെ ഗൂഢനീക്കങ്ങളാണിത് എന്ന ആരോപണങ്ങള് ശക്തമാണ്.
നവംബര് 15 ന് രാവിലെ 8.45 നായിരുന്നു മലമ്പുഴ മമ്പറത്ത് വച്ച് സഞ്ജിത്ത് കൊല്ലപ്പെട്ടത്. കിണാശ്ശേരി മമ്പ്രത്താണ് കൊലപാതകം നടന്നത്. ഭാര്യയെ നഗരത്തിലെ ജോലിസ്ഥലത്തേക്കു കൊണ്ടുപോകുമ്പോള് കാറിലെത്തിയ സംഘം സഞ്ജിത്തിന്റെ ബൈക്ക് ഇടിച്ചു തെറിപ്പിക്കുകയായിരുന്നു. റോഡില് തെറിച്ചു വീണ സഞ്ജിത്തിനെ ഭാര്യ അര്ഷികയ്ക്കു മുന്നില് വെച്ചാണ് എസ്ഡിപിഐ ഗുണ്ടകള് വടിവാളുമായി ആക്രമിച്ചത്. തുടര്ന്ന് ഇവര് കാറില് കയറി രക്ഷപ്പെടുകയായിരുന്നു.
