കൊടുങ്ങല്ലൂര്: പോലീസ് കസ്റ്റഡിയില് സൂക്ഷിച്ചിരുന്ന 50-ഓളം വാഹനങ്ങള് കത്തി നശിച്ചു. കോട്ടപ്പുറം പാലത്തിന് താഴെ ദേശീയപാതാ അതോറിറ്റിയുടെ അധീനതയിലുള്ള സ്ഥലത്ത് സൂക്ഷിച്ചിരുന്ന വാഹനങ്ങളാണ് അഗ്നിക്കിരയായത്.
വാഹനങ്ങള് പുറത്തുനിന്ന് കാണാനാകാത്തവിധം പുല്ലും കാടും വളര്ന്ന് മൂടിയ നിലയിലായിരുന്നു. ഉണങ്ങിയ പുല്ലിന് തീപിടിച്ച് വാഹനങ്ങളിലേക്ക് പടരുകയായിരുന്നു . പോലീസും അഗ്നിരക്ഷാസേനയും ചേര്ന്ന് രണ്ടുമണിക്കൂര് പരിശ്രമിച്ചാണ് തീ നിയന്ത്രണ വിധേയമാക്കിയത്.
പ്രദേശത്ത് കാടും പുല്ലും വലിയ തോതില് വളര്ന്നു നിന്നത് രക്ഷാപ്രവര്ത്തകര്ക്ക് ഏറെ തടസങ്ങള് സൃഷ്ടിച്ചു. ചന്തപ്പുര-കോട്ടപ്പുറം ബൈപ്പാസിനു വേണ്ടി ഏറ്റെടുത്ത സ്ഥലത്ത് സൂക്ഷിച്ചിരുന്ന വാഹനങ്ങള് അഞ്ചുവര്ഷം മുന്പാണ് ഇവിടേക്ക് മാറ്റിയത്. ഒട്ടുമിക്ക വാഹനങ്ങളും വീണ്ടും ഉപയോഗിക്കാന് പറ്റാത്തവിധം കേടുവന്ന് നശിച്ചവയായിരുന്നു. അനധികൃത മണല് കടത്ത് കേസുകളിലും അപകടങ്ങളിലും പെട്ട ലോറികളും ടിപ്പറുകളുമാണ് കത്തിനശിച്ചത്.
