കൊടുമൺ: ആരോഗ്യമുള്ള ഒരു നല്ല തലമുറയെ വാർത്തെടുക്കാൻ സമൂഹം ഒറ്റക്കെട്ടായി അണിചേരണമെന്ന് ഡെപ്യൂട്ടി സ്പീക്കർ. സംസ്ഥാന വനിത ശിശുവികസന വകുപ്പ് നടപ്പിലാക്കുന്ന പോഷകബാല്യം പദ്ധതിയുടെ ഏഴംകുളം പഞ്ചായത്ത് തല ഉദ്ഘാടനം നിർവഹിച്ച് സംസാരിക്കുകയായിരുന്നു ഡെപ്യൂട്ടി സ്പീക്കർ. ചടങ്ങിൽ ഗ്രാമപഞ്ചായത്ത് പ്രസിഡന്റ് ആശ വി എസ് അദ്ധ്യക്ഷ ആയിരുന്നു. ക്ഷേമ കാര്യ സ്റ്റാന്റിംഗ് കമ്മറ്റി ചെയർമാൻ അഡ്വ എ താജുദീൻ സ്വാഗതം ആശംസിച്ചു.
പറക്കോട് ബ്ളോക്ക് പഞ്ചായത്ത് പ്രസിഡന്റ് ആർ തുളസീധരൻപിള്ള മുഖ്യപ്രഭാഷണം നടത്തി. ഗ്രാമപഞ്ചായത്ത് വൈസ് പ്രസിഡന്റ് അഡ്വ ആർ ജയൻ, ഗ്രാമപഞ്ചായത്ത് വികസനകാര്യ സ്റ്റാന്റിംഗ് കമ്മറ്റി ചെയർ പേഴ്സൺ ബീനാജോർജ്, ആരോഗ്യവിദ്യാഭ്യാസ സ്റ്റാന്റിംങ്ങ് കമ്മറ്റി ചെയർപേഴ്സൺ രാധാമണി ഹരികുമാർ,ഗ്രാമപഞ്ചായത്ത് മെമ്പർമാരായ ബാബുജോൺ, രജിത ജെയ്സൺ , ശാന്തി കെ കുട്ടൻ, സുരേഷ് പി, വിനോദ് തുണ്ടത്തിൽ, ബേബി ലീന, ഷീജ എസ്, പറക്കോട് ബ്ലോക്ക് ശിശുവികസന പദ്ധതി ഓഫീസർ റാണി എസ്, ഐ സി ഡി സൂപ്രവൈസർ രജിത ആർ തുടങ്ങിയവർ സംസാരിച്ചു.
സുസ്ഥിര വികസന ലക്ഷ്യം കൈവരിക്കുന്നതിനുമായാണ് ആഴ്ചയില് രണ്ട് ദിവസം മുട്ടയും, രണ്ട് ദിവസം പാലും നല്കുന്നത്. ഒരു കുട്ടിയ്ക്ക് ഒരു ദിവസം ഒരു ഗ്ലാസ് പാല് വീതം ആഴ്ചയില് തിങ്കള്, വ്യാഴം ദിവസങ്ങളിലും, ആഴ്ചയില് ചൊവ്വ, വെള്ളി ദിവസങ്ങളില് മുട്ടയും നല്കുന്നതാണ്. അങ്കണവാടിയിലെ 3 വയസ് മുതല് ആറ് വയസ് വരെയുളള 4 ലക്ഷത്തോളം പ്രീസ്കൂള് കുട്ടികള്ക്ക് ഈ പദ്ധതിയുടെ പ്രയോജനം ലഭിക്കുമെന്നും ഡെപ്യൂട്ടിസ്പീക്കർ പറഞ്ഞു.
