ഉപ്പുതറ : അയൽക്കാർ തമ്മിലുണ്ടായ തർക്കത്തെ തുടർന്ന് യുവതിക്ക് വെട്ടേറ്റു. ചപ്പാത്ത്, ലോൺട്രി പുതുപ്പറമ്പിൽ ബിൻസി(41) ക്കാണ് വെട്ടേറ്റത്. സംഭവത്തിൽ ചപ്പാത്ത് സ്വദേശികളായ പുത്തൻപുരയ്ക്കൽ ലോറൻസ് (41), പുത്തൻപുരയ്ക്കൽ ജോബി(34) എന്നിവരെ ഉപ്പുതറ പോലീസ് അറസ്റ്റുചെയ്തു.
ശനിയാഴ്ച വൈകീട്ട് അഞ്ചോടെയാണ് സംഭവം. ബിൻസിയുടെ വീടിനു മുൻവശത്തുകൂടിയുള്ള റോഡിലെ കാനയിൽ മാലിന്യം കത്തിച്ചതിനെ ചോദ്യം ചെയ്ത് പ്രതികൾ ബിൻസിയുടെ വീട്ടിലെത്തി ബഹളം വെയ്ക്കുകയും അസഭ്യം പറയുകയും കത്തിയെടുത്തു ഭീഷണിപ്പെടുത്തുകയും ചെയ്തു.
എതിർത്തതോടെ ബിൻസിയുടെ മുടിയിൽ കുത്തിപ്പിടിച്ച് പ്രതികൾ വലിച്ചിഴയ്ക്കുകയും കഴുത്തിനു വെട്ടുകയുമായിരുന്നു. ബിൻസി വെട്ട് തടഞ്ഞതിനാൽ കൈയ്യിലാണ് വെട്ടേറ്റത്. ഇടതുകൈയ്യിൽ രണ്ടിടങ്ങളിൽ വെട്ടേറ്റിട്ടുണ്ട്.
തടയാൻ ശ്രമിച്ച ബിൻസിയുടെ പിതാവ് നേശമണി (70), അമ്മ മേരി(65) എന്നിവരെയും പ്രതികൾ മർദിച്ചു. വിവരമറിഞ്ഞ് എത്തിയ ഉപ്പുതറ സി.ഐ. ഇ.ബാബു, എസ്.ഐമാരായ സജിമോൻ, ഹാഷിം എന്നിവരുടെ നേതൃത്വത്തിലുള്ള പോലീസ് പ്രതികളെ അറസ്റ്റ് ചെയ്തു. ബിൻസിയെ കട്ടപ്പന താലൂക്ക് ആശുപത്രിയിൽ പ്രവേശിപ്പിച്ചു.