കാഞ്ഞങ്ങാട് : പത്ത് കോടി വിലവരുന്ന ആംബര്‍ഗ്രീസുമായി മൂന്ന് പേര്‍ പിടിയില്‍. കര്‍ണാടകയില്‍ നിന്ന് എത്തിച്ച ആംബര്‍ ഗ്രീസ് ലോഡ്ജില്‍ കൈമാറുന്നതിനിടെ ഹോസ്ദുര്‍ഗ് പോലീസാണ് ഇവരെ പിടികൂടിയത്. കാഞ്ഞങ്ങാട്ടെ ടാക്സി ഡ്രൈവര്‍ കൊവ്വല്‍പ്പള്ളി കടവത്ത് വളപ്പില്‍ വീട്ടില്‍ കെ.വി. നിഷാന്ത് (41), അതിഞ്ഞാല്‍ മുറിയനാവിയിലെ പെയിന്റിങ് തൊഴിലാളി മാടമ്പില്ലത്ത് വീട്ടില്‍ സിദ്ദിഖ് മാടമ്പില്ലത്ത് (37), കൊട്ടോടി മാവില്‍ വീട്ടില്‍ പി. ദിവാകരന്‍ എന്നിവരെയാണ് പോലീസ് അറസ്റ്റ് ചെയ്തത്.
ആംബര്‍ ഗ്രീസ് ആവശ്യപ്പെട്ട് പോലീസാണ് ഇവരെ സമീപിച്ചത്. ഇതോടെ സംഘം സാധനവുമായി ലോഡ്ജില്‍ എത്തി. പോലീസ് ഇവിടെയെത്തി സംഘത്തെ കയ്യോടെ പിടികൂടുകയായിരുന്നു. നിഷാന്തും സിദ്ദിഖും ചേര്‍ന്നാണ് കര്‍ണാടകയില്‍നിന്ന് ആംബര്‍ഗ്രീസ് എത്തിച്ചത്. ദിവാകരന്‍ അത് വില്‍ക്കുന്ന ഇടനിലക്കാരനായിരുന്നുവെന്ന് പോലീസ് പറഞ്ഞു.
