ന്യൂഡല്ഹി: ഹോട്ടലുകളിലും മറ്റും ഉപയോഗിക്കുന്ന വാണിജ്യ പാചക വാതക സിലിണ്ടറുകളുടെ വില 91.50 രൂപ കുറയും. അന്താരാഷ്ട്ര വില കുറഞ്ഞതിനെ തുടര്ന്നാണിത്. ഇതോടെ 19 കിലോഗ്രാം വാണിജ്യ എല്.പി.ജി സിലിണ്ടറിന്റെ വില ഡല്ഹിയില് 1,976.50 രൂപയില്നിന്ന് 1,885 രൂപയായി. എന്നാല്, ഗാര്ഹിക സിലിണ്ടറുകളുടെ വില കുറച്ചിട്ടില്ല. 14.2 കിലോ സിലിണ്ടറിന് 1,053 രൂപ തുടരും. ഗാര്ഹിക പാചകവാതക വില നേരത്തെതന്നെ കുറവാണെന്നും അന്താരാഷ്ട്ര വിലയിലെ കുറവോടെ ഇപ്പോഴാണ് ഗാര്ഹിക സിലിണ്ടര് വില്പനയിലെ നഷ്ടം ഇല്ലാതായതെന്നുമാണ് കമ്ബനികളുടെ വാദം.
വാണിജ്യ-ഗാര്ഹിക സിലിണ്ടര് വിലകളിലെ വലിയ വ്യത്യാസം കാരണം ഗാര്ഹിക സിലിണ്ടറുകള് വാണിജ്യാവശ്യങ്ങള്ക്ക് ദുരുപയോഗം ചെയ്യുന്നത് വര്ധിച്ച സാഹചര്യത്തില് ഗാര്ഹിക സിലിണ്ടറുകള് അനുവദിക്കുന്നതിന് നിയന്ത്രണം വരുത്തിയിട്ടുണ്ട്. ഭാരത് പെട്രോളിയം കോര്പറേഷന് ലിമിറ്റഡ് 15 ദിവസത്തിനുള്ളില് ഒരു സിലിണ്ടറായി റീഫില് പരിമിതപ്പെടുത്തി. ഇന്ത്യന് ഓയില് കോര്പറേഷന്, ഹിന്ദുസ്ഥാന് പെട്രോളിയം കോര്പറേഷന് ലിമിറ്റഡ് എന്നിവയും ഇത് പിന്തുടരാന് സാധ്യതയുണ്ട്.