ഐപിഎല്ലിൽ രാജസ്ഥാൻ റോയൽസിനായി തകർപ്പൻ ബാറ്റിംഗ് പ്രകടനം പുറത്തെടുക്കുന്ന യുവതാരം വൈഭവ് സൂര്യവൻഷിയെ അഭിനന്ദനങ്ങൾ കൊണ്ട് മൂടുകയാണ് പ്രശസ്ത കമന്റേറ്ററും മുൻ വെസ്റ്റ് ഇൻഡീസ് താരവുമായ ഇയാൻ ബിഷപ്പ്.ജസ്പ്രിത് ബുംറ, ജോഷ് ഹേസൽവുഡ് തുടങ്ങിയ ലോകോത്തര ബൗളർമാർക്ക് പോലും വൈഭവിനെ തളയ്ക്കാനാകുന്നില്ലെന്ന് ബിഷപ്പ് നിരീക്ഷിച്ചു. നെറ്റ്സിൽ ജോഫ്ര ആർച്ചറെയും മത്സരങ്ങളിൽ ബുംറയെയും നേരിടുമ്പോൾ ഒട്ടും ഭയമില്ലാതെയാണ് താരം ബാറ്റ് വീശുന്നതെന്നും, ടി20 ക്രിക്കറ്റിന് അനുയോജ്യമായ ബേസ്ബോൾ ശൈലിയാണ് താരത്തിന്റേതെന്നും അദ്ദേഹം കൂട്ടിച്ചേർത്തു. പരിചയസമ്പന്നരായ ബൗളർമാർ പലവിധ പ്ലാനുകൾ പരീക്ഷിച്ചിട്ടും വൈഭവിന്റെ വിക്കറ്റ് വീഴ്ത്താൻ പാടുപെടുകയാണ്. കഴിഞ്ഞ മത്സരത്തിൽ അർഷ്ദീപ് സിംഗ് തുടർച്ചയായ യോർക്കറുകളിലൂടെ താരത്തെ സമ്മർദ്ദത്തിലാക്കാൻ ശ്രമിച്ചെങ്കിലും ഫലമുണ്ടായില്ല.
വൈഭവിനെ പുറത്താക്കാൻ എന്തെങ്കിലും വഴിയുണ്ടോ എന്ന ചോദ്യത്തിന്, ‘ബാക്ക് ഓഫ് ലെങ്ത്’ പന്തുകൾ താരത്തെ അല്പം കുഴപ്പിക്കുന്നുണ്ടെന്ന് ബിഷപ്പ് ചൂണ്ടിക്കാട്ടി. എങ്കിലും നിലവിലെ ഫോമിൽ ഏതൊരു ബൗളർക്കും വൈഭവ് വലിയ വെല്ലുവിളിയാണെന്ന് അദ്ദേഹം ഓർമ്മിപ്പിച്ചു. ഈ സീസണിലെ ഓറഞ്ച് ക്യാപ് റേസിൽ നിലവിൽ മൂന്നാം സ്ഥാനത്താണ് വൈഭവ് സൂര്യവൻഷി. 9 മത്സരങ്ങളിൽ നിന്ന് 238.09 എന്ന അവിശ്വസനീയമായ സ്ട്രൈക്ക് റേറ്റിൽ 400 റൺസാണ് താരം അടിച്ചുകൂട്ടിയത്. ഇന്ന് ഡൽഹി ക്യാപിറ്റൽസിനെതിരെ നടക്കുന്ന മത്സരത്തിൽ മികച്ച പ്രകടനം പുറത്തെടുത്താൽ ഓറഞ്ച് ക്യാപ് പട്ടികയിൽ ഒന്നാമതുള്ള അഭിഷേക് ശർമയെയും (425 റൺസ്) ഹെൻഡ്രിച്ച് ക്ലാസനെയും (414 റൺസ്) മറികടന്ന് ഒന്നാം സ്ഥാനത്തെത്താൻ വൈഭവിന് അവസരമുണ്ട്.
