കൊടുമൺ : പ്രായപൂർത്തിയാകാത്ത പെൺകുട്ടിയെ പീഡിപ്പിച്ച ശേഷം ഒളിവിൽ പോയ പ്രതിയെ തേക്കുതോട് നിന്നും കൊടുമൺ പോലീസ് പിടികൂടി. പന്തളം തെക്കേക്കര കണ്ഠളൻതറ ചെറുലയം വള്ളിപ്പറമ്പിൽ വീട്ടില് സുകുമാരൻ (76) നെയാണ് തേക്കുതോട് താഴെ പറക്കുളത്തെ ഒളിത്താവളത്തിൽ നിന്ന് പിടികൂടിയത്. കൊടുമൺ പോലീസ് സ്റ്റേഷനിൽ പോക്സോ കേസിൽ പ്രതിയായതിന് പിന്നാലെ ഇയാള് ഒളിവിൽ പോവുകയായിരുന്നു. ഈ മാസം രണ്ടാം തീയതി ആയിരുന്നു കേസിന് ആസ്പദമായ സംഭവം. പ്രായപൂർത്തിയാകാത്ത പെൺകുട്ടിയെ ലൈംഗിക പീഡനത്തിന് ഇരയാക്കിയ ശേഷം തുമ്പമൺ, തണ്ണിത്തോട്, തേക്കുതോട് മുതലായ സ്ഥലങ്ങളിൽ ഇയാള് ഒളിവിൽ കഴിഞ്ഞു വരികയായിരുന്നു.
പ്രതിയെ ഉടന് പിടികൂടണമെന്ന് ജില്ലാ പോലീസ് മേധാവി നല്കിയ നിർദ്ദേശത്തെ തുടര്ന്ന് കൊടുമൺ പോലീസ് ഇൻസ്പെക്ടർ ശ്രീലാൽ ചന്ദ്രശേഖറിന്റെ നേതൃത്വത്തിൽ സബ് ഇൻസ്പെക്ടർ ജിനു ജെ.യു, സി.പി.ഓ മാരായ അഭിലാഷ്, ശ്യാം, അഖിൽ കൃഷ്ണൻ എന്നിവരടങ്ങിയ പ്രത്യേക അന്വേഷണസംഘം രൂപീകരിക്കുകയും ഇവര് നടത്തിയ അന്വേഷണത്തില് തേക്കുതോട് താഴെപ്പറക്കുളത്ത് നിന്നും ഇയാളെ പിടികൂടുകയുമായിരുന്നു. ഇവിടെ ഒളിത്താവളത്തിൽ കഴിഞ്ഞുവരുന്നതിനിടെയാണ് പ്രതിയെ പോലീസ് അറസ്റ്റ് ചെയ്തത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.
