കണ്ണൂര് : സെന്ട്രല് ജയിലില് നിന്നും കാസര്കോട് കോടതിയില് ഹാജരാക്കാന് കൊണ്ടുപോയ റിമാന്ഡ് പ്രതി പോലീസിനെ കബളിപ്പിച്ച് ഓടി രക്ഷപ്പെട്ടു. ആലമ്പാടി സ്വദേശി അമീര് അലി (23) ആണ് കാസര്കോട് വെച്ച് പോലീസുകാരെ തള്ളിമാറ്റി രക്ഷപ്പെട്ടത്. മെയ് 12ന് ബദിയടുക്കയില് വെച്ച് നമ്പര് പ്ലേറ്റ് ഇല്ലാത്ത കാറില് കടത്തുകയായിരുന്ന 8 ഗ്രാം എംഡിഎംഎയുമായാണ് അമീര് അലി പിടിയിലായത്. ഈ വാഹനത്തില് നിന്ന് രണ്ട് കൈത്തോക്കുകളും ബദിയടുക്ക പോലീസ് കണ്ടെടുത്തിരുന്നു.
കേസില് റിമാന്ഡിലായി കണ്ണൂര് സെന്ട്രല് ജയിലില് കഴിയുകയായിരുന്ന ഇയാളെ ഇന്ന് രാവിലെയാണ് കാസര്കോട് പ്രിന്സിപ്പല് സെഷന്സ് കോടതിയിലേക്ക് കൊണ്ടുപോയത്. കണ്ണൂര് എആര് ക്യാംപിലെ മൂന്ന് പോലീസ് ഉദ്യോഗസ്ഥര് സുരക്ഷയ്ക്ക് ഉണ്ടായിരുന്നു. കാസര്കോട് എത്തിയപ്പോള് പോലീസിനെ തള്ളിമാറ്റുകയും വിലങ്ങോടെ ഓടി രക്ഷപ്പെടുകയുമായിരുന്നു.
