പുനലൂര്‍ : ബീഡി വാങ്ങി കൊടുക്കാത്തതിന് കോടതിയില്‍ ഹാജരാക്കി തിരികെ കൊണ്ടുപോകുകയായിരുന്ന പ്രതി കൈവിലങ്ങുകൊണ്ട് തലയ്ക്ക് സ്വയം മുറിവേല്‍പ്പിച്ചതായി കൂടെയുണ്ടായിരുന്ന പോലീസുകാര്‍ പറഞ്ഞു. പാലോട് സ്വദേശി ലിനു (30) വാണ് സ്വയം പരിക്കേല്‍പ്പിച്ചത്. പുനലൂര്‍ കെ എസ് ആര്‍ ടി സി സ്റ്റാന്‍ഡില്‍ തിങ്കളാഴ്ച ഉച്ചയ്ക്ക് രണ്ടുമണിയോടെയായിരുന്നു സംഭവം.
സംഭവത്തെ കുറിച്ച്‌ പോലീസ് പറയുന്നത്:
അബ്കാരി കേസില്‍ വിചാരണത്തടവുകാരനായ പ്രതിയെ പുനലൂരിലെ കോടതിയില്‍ ഹാജരാക്കി തിരികെ കൊണ്ടുപോകുമ്പോഴായിരുന്നു സംഭവം. ബസ് സ്റ്റാന്‍ഡില്‍ എത്തിയപ്പോള്‍ തനിക്ക് ബീഡിവേണമെന്ന് ഒപ്പമുണ്ടായിരുന്ന പോലീസുകാരോട് ഇയാള്‍ ആവശ്യപ്പെട്ടെങ്കിലും അവര്‍ വിസമ്മതിച്ചു. ഇതോടെയാണ് പ്രതി സ്വയം പരാക്രമം നടത്തിയത്.
പരിക്കേറ്റ പ്രതിയെ പുനലൂര്‍ താലൂക് ആശുപത്രിയില്‍ പ്രവേശിപ്പിച്ച്‌ ചികിത്സ നല്‍കി. പിന്നീട് പോലീസിന്റെ വാഹനത്തില്‍ തിരികെക്കൊണ്ടുപോയി. ചടയമംഗലത്തുനിന്ന് എക്സൈസ് കേസില്‍ അറസ്റ്റിലായ പ്രതി തിരുവനന്തപുരം സെന്‍ട്രല്‍ ജയിലിലെ വിചാരണത്തടവുകാരനാണ്.
