കൊച്ചി : നടിയെ ആക്രമിച്ച കേസ് അട്ടിമറിയ്ക്കാന് ശ്രമിച്ച അഭിഭാഷകനും നീരീക്ഷണത്തില്. ഗൂഢാലോചന കേസില് നടന് ദിലീപ് ഉള്പ്പെടെയുള്ള പ്രതികളുടെ ചോദ്യം ചെയ്യല് പുരോഗമിക്കെ നടിയെ ആക്രമിച്ച കേസ് അട്ടിമറിയ്ക്കാന് ശ്രമിച്ചെന്ന ആരോപണത്തില് കൂടുതല് വിവരങ്ങള് പുറത്ത്. ദിലീപിന്റെ സഹോദരി ഭര്ത്താവ് സുരാജിന്റെ പണമിടപാടുകള് കേന്ദ്രീകരിച്ചുള്ള അന്വേഷണമാണ് സാക്ഷികളെ സ്വാധീനിക്കാന് ശ്രമിച്ചെന്ന ആരോപണങ്ങള് ശരിവയ്ക്കുന്ന തരത്തില് തെളിവുകള് നല്കുന്നത് എന്നാണ് വിവരം. സാക്ഷികളെ സ്വാധീനിക്കാന് സുരാജ് വഴി പണം നല്കിയതായിയാണ് കണ്ടെത്തല്. ഇതിനെ സാധുകരിക്കുന്ന ഡിജിറ്റല് പണം ഇടപാടുകളുടെ വിവരങ്ങള് ഉള്പ്പെടെയാണ് അന്വേഷണ സംഘത്തിന് ലഭിച്ചത്. സാക്ഷികളെ സ്വാധീനിക്കാന് ശ്രമിച്ചെന്ന സംഭവത്തില് പ്രമുഖ അഭിഭാഷകന്റെ ഇടപെടലും പോലീസ് പരിശോധിക്കുന്നുണ്ട്. അഭിഭാഷകന് വഴിയും സാക്ഷികളെ സ്വാധീനിക്കാന് ശ്രമിച്ചെന്നാണ് പോലീസ് വിലയിരുത്തല്.
അതിനിടെ ബാലചന്ദ്ര കുമാറിന്റെ വെളിപ്പെടുത്തലില് വിഐപി എന്ന് വിശേഷിപ്പിക്കുന്ന ശരത്തിലേക്ക് അന്വേഷണം പുരോഗമിക്കെ കാണാമറയത്തുള്ള ഇയാള് ഹാജരാകാന് തയ്യാറാണെന്ന് അറിയിച്ചതായും റിപ്പോര്ട്ടുകളുണ്ട്. തനിക്കറിയാവുന്ന കാര്യങ്ങളെല്ലാം പറയാമെന്ന് ശരത് അന്വേഷണ ഉദ്യോഗസ്ഥരെ അറിയിച്ചെന്നാണ് വിവരം. സുഹൃത്ത് മുഖേനയാണ് ശരത് ഇക്കാര്യങ്ങള് അന്വേഷണ ഉദ്യോഗസ്ഥര് അറിയിച്ചതെന്നാണ് വിവരം. നടിയെ ആക്രമിച്ച കേസില് ജാമ്യം ലഭിച്ച് വീട്ടിലെത്തിയ ദിലീപിന്റെ അടുത്തേക്ക് നടിയെ ആക്രമിച്ച ദൃശ്യങ്ങള് എത്തിച്ച വ്യക്തിയാണ് എന്ന് വിലയിരുത്തുന്നയാളാണ് ശരത്. എന്നാല് ദിലീപിന് ജാമ്യം എടുക്കാന് സഹായിക്കുകമാത്രമാണ് താന് ചെയ്തത് എന്നാണ് ശരത്തിന്റെ അവകാശവാദമെന്നാണ് റിപ്പോര്ട്ടുകള്.
