ഹൈദരാബാദ്: ഇന്ത്യയുടെയും എയര് ഇന്ത്യയുടെയും ആദ്യ എയര്ബസ് എ350 വിമാനം വ്യാഴാഴ്ച പുറത്തിറക്കി. ഹൈദരാബാദില് നടന്ന വിങ്സ് ഇന്ത്യ 2024-ല് വ്യോമയാന മന്ത്രി ജ്യോതിരാദിത്യ സിന്ധ്യയാണ് ഉദ്ഘാടനം നിര്വഹിച്ചത്. ഈ വര്ഷം മെയ് മാസത്തോടുകൂടി ആറ് എ350 വിമാനങ്ങള്കൂടി എയര് ഇന്ത്യയ്ക്ക് ലഭിക്കും. ജനുവരി 22ഓടെ ആദ്യവിമാനത്തിന്റെ ആഭ്യന്തര സര്വീസ് ആരംഭിക്കും. ക്രമേണ അന്താരാഷ്ട്ര റൂട്ടുകളിലേക്ക് ഇത് മാറുകയും ചെയ്യും. എയര്ഇന്ത്യയുടെ ഗെയിം ചേഞ്ചറാണ് എ350 വിമാനങ്ങളെന്ന് കമ്പനി സിഇഒയും എംഡിയുമായ കാംപെല് വില്സണ് വ്യക്തമാക്കി.
‘ഇത് ഞങ്ങളുടെ യാത്രക്കാരുടെ അനുഭവം ഉയര്ത്തുക മാത്രമല്ല, പുതിയ റൂട്ടുകളും വിപുലീകരണത്തിനുള്ള അവസരങ്ങളും തുറക്കുകയും കൂടിയാണ് ചെയ്യുന്നത്. വിമാനങ്ങളുടെയും ഉത്പന്നങ്ങളുടെയും ഈ നവീകരണം എയര് ഇന്ത്യയെ ലോക വ്യോമയാന മേഖലയില് ഉയര്ന്ന തലത്തിലേക്ക് തിരികെ കൊണ്ടുവരും’ എയര്ഇന്ത്യ സി.ഇ.ഒ വ്യക്തമാക്കി.
