തിരുവനന്തപുരം: മകന് അനില് ആന്റണി ബിജെപിയില് ചേരാനെടുത്ത തീരുമാനം വേദനയുണ്ടാക്കിയെന്ന് എകെ ആന്റണി. അനിലിന്റേത് തികച്ചും തെറ്റായ തീരുമാനമായിപ്പോയെന്ന് അദ്ദേഹം മാധ്യമങ്ങളോട് പ്രതികരിച്ചു. അനില് ആന്റണിയുടെ ബിജെപിയിലേക്കുള്ള കൂടുമാറ്റത്തോട് വികാരാധീനനായിട്ടാണ് എ കെ ആന്റണി പ്രതികരിച്ചത്. അനിലുമായി ബന്ധപ്പെട്ട വിഷയങ്ങള് ഞാന് മാധ്യമങ്ങള്ക്ക് മുന്നില് സംസാരിക്കില്ലെന്നും ഇത് ആദ്യത്തേയും അവസാനത്തേയും വാര്ത്താ സമ്മേളനമാകുമെന്നും അദ്ദേഹം വ്യക്തമാക്കി.
ഇന്ത്യയുടെ ഐക്യവും ആണിക്കല്ലും ബഹുസ്വരതയും മതേതരത്വുമാണ്. എന്നാല് മോദി സര്ക്കാര് അധികാരമേറ്റതിന് ശേഷം രാജ്യത്തിന്റെ ആസൂത്രിതമായി നയങ്ങളെ ഇല്ലാതാക്കിയെന്നും എകെ ആന്റണി കുറ്റപ്പെടുത്തി. താന് അവസാനശ്വാസം വരെയും ബിജെപിക്കും ആര്എസ്എസിനെതിരെ ശബ്ദമുയര്ത്തുമെന്നും അതില് യാതൊരു സംശയവുമില്ലെന്നും ആന്റണി പറഞ്ഞു.
