തിരുവനന്തപുരം : എകെജി സെന്ററില് ആക്രമണം നടത്തിയ കേസിലെ പ്രതി പോലീസ് കസ്റ്റഡിയില്. ആറ്റിപ്ര മണ്ഡലം യൂത്ത് കോൺഗ്രസ് പ്രസിഡന്റ് ജിതിനെയാണ് കസ്റ്റഡിയിൽ എടുത്തിരിക്കുന്നത്. ക്രൈംബ്രാഞ്ച് ഓഫിസിൽ ജിതിനെ ചോദ്യം ചെയ്ത് വരുന്നു. ജൂണ് 30ന് രാത്രി 11.25നാണ് ആക്രമണം ഉണ്ടായത്. എകെജി സെന്ററിന്റെ മുഖ്യകവാടത്തിനു സമീപത്തുള്ള ഹാളിന്റെ ഗേറ്റിലൂടെയാണ് സ്ഫോടക വസ്തു എറിഞ്ഞത്.
25 മീറ്റര് അകലെ 7 പോലീസുകാര് കാവല്നില്ക്കുമ്പോഴാണ് കുന്നുകുഴി ഭാഗത്തുനിന്ന് ബൈക്കിലെത്തിയ ആൾ സ്ഫോടക വസ്തു എറിഞ്ഞത്. നൂറിലധികം സിസിടിവി ക്യാമറകള് പോലീസ് പരിശോധിക്കുകയും അതില് 250ല് അധികം ആളുകളെ ചോദ്യം ചെയ്യുകയും ചെയ്തു. ചുവന്ന സ്കൂട്ടറിലാണ് അക്രമി എത്തിയതെന്നും അത് ഡിയോ സ്കൂട്ടറാണെന്നതും മാത്രമായിരുന്നു ആകെ കണ്ടെത്തിയ വിവരങ്ങൾ. ലഭിച്ച സിസിടിവി ദൃശ്യങ്ങളില്നിന്ന് സ്കൂട്ടറിന്റെ നമ്പര് ലഭിച്ചിരുന്നില്ലന്ന് പോലീസ് അറിയിച്ചത്. അതേസമയം എറിഞ്ഞത് സാധാരണ പടക്കമാണെന്നാണ് ഫൊറന്സിക് റിപ്പോര്ട്ടില് ഉള്ളത്.
