പത്തനംതിട്ട : നഗരസഭാ പരിധിയിലെ പൊതുജന ആരോഗ്യ കേന്ദ്രങ്ങൾക്കെല്ലാം സ്വന്തം ആസ്ഥാനം ഒരുക്കുമെന്ന് നഗരസഭാ ചെയർമാൻ അഡ്വ. സക്കീർ ഹുസൈൻ പറഞ്ഞു. രണ്ടാം വാർഡ് അഞ്ചക്കാലായിലെ ജനകീയ ആരോഗ്യ കേന്ദ്രത്തിന്റെ പുതിയ കെട്ടിടം ഉദ്ഘാടനം ചെയ്യുകയായിരുന്നു അദ്ദേഹം. ആരോഗ്യ സേവനരംഗത്ത് കാര്യക്ഷമവും നിരന്തരവുമായ ഇടപെടൽ ആണ് ഭരണസമിതി നടത്തിവരുന്നത്. ഇതിന്റെ തുടർച്ച ഉറപ്പാക്കുകയാണ് പൊതുജന ആരോഗ്യ മേഖലയ്ക്ക് നൽകാൻ കഴിയുന്ന മികച്ച സംഭാവന എന്നും അദ്ദേഹം പറഞ്ഞു. രണ്ട് പതിറ്റാണ്ടിലേറെയായി വാടക കെട്ടിടത്തിലെ അപര്യാപ്തതകളിൽ പ്രവർത്തിച്ചിരുന്ന ആരോഗ്യ കേന്ദ്രമാണ് ഇപ്പോൾ സ്വന്തം കെട്ടിടത്തിലേക്ക് മാറ്റി സ്ഥാപിച്ചിരിക്കുന്നത്.
നഗരസഭയിലെ 1, 2 , 3, 4, 32 വാർഡുകളിലെ ജനങ്ങൾക്ക് കൂടുതൽ സൗകര്യപ്രദമാകുന്ന തരത്തിൽ പ്രദേശത്തിന്റെ ഏതാണ്ട് മദ്ധ്യത്തിലാണ് ജനകീയ ആരോഗ്യ കേന്ദ്രം ഇപ്പോൾ പ്രവർത്തനം ആരംഭിച്ചത്. വാർഡ് കൗൺസിലർ പി.കെ അനീഷ് അധ്യക്ഷത വഹിച്ചു. ആരോഗ്യകാര്യ സ്റ്റാൻഡിങ് കമ്മിറ്റി ചെയർപേഴ്സൺ ജെറി അലക്സ്, കൗൺസിലർമാരായ ആർ സാബു, സി.കെ അർജുനൻ, ശോഭാ കെ മാത്യു, പൊതുപ്രവർത്തകരായ എം.ജെ രവി, അജിൻ വർഗീസ്, ബിനി ഫിലിപ്പ്, ജോളി ആന്റണി, അജു വർഗീസ്, റോയി വർഗീസ് തുടങ്ങിയവർ പങ്കെടുത്തു.
