കോന്നി : കോന്നി താവളപ്പാറയില് മൂരിക്കിടാവിനെ അജ്ഞാത ജീവി ആക്രമിച്ച് കൊന്നതിനെ തുടര്ന്ന് വനപാലകര് നിരീക്ഷണ ക്യാമറ സ്ഥാപിച്ചു. പുലര്ച്ചെയായിരുന്നു സംഭവം. താവളപ്പാറ കോട്ടയംകാരുടെ എസ്റ്റേറ്റിലെ വാച്ചര് ലാലച്ചന്റെ ഒന്നര വയസ് പ്രായമുള്ള കിടാവിനെയാണ് അജ്ഞാത ജീവി ആക്രമിച്ചത്. ജഡം പകുതിയിലേറെ ഭക്ഷിച്ചിട്ടുണ്ട്. രാവിലെ കിടാവിനെ റബ്ബര് തോട്ടത്തില് അഴിച്ച് വിട്ടതിന് ശേഷമാണ് സംഭവം നടന്നതെന്ന് ഉടമ പറയുന്നു. നായയുടെ കുര കേട്ട് റബ്ബര് തോട്ടത്തില് എത്തിയപ്പോഴാണ് കിടാവിനെ ആക്രമിച്ച് കൊന്ന വിവരം ഉടമ അറിയുന്നത്.
ഉടന് തന്നെ വനപാലകരെ വിവരം ധരിപ്പിക്കുകയും ഞള്ളൂര് ഉത്തരകുമരംപേരൂര് ഫോറസ്റ്റേഷന് ഡെപ്യൂട്ടി റെയ്ഞ്ച് ഓഫീസര് നൗഷാദിന്റെ നേതൃത്വത്തിലുള്ള സംഘം സ്ഥലത്തെത്തി അന്വേഷണം നടത്തുകയുമായിരുന്നു. സ്ഥലത്ത് വനപാലകര് നിരീക്ഷണ ക്യാമറയും സ്ഥാപിച്ചിട്ടുണ്ട്. ആക്രമിച്ചത് ഏത് ജീവി ആണെന്ന് സ്ഥിരീകരിക്കാത്തതിനെ തുടര്ന്ന് കിടാവിന്റെ ജഡം മറവ് ചെയ്തിട്ടില്ല. ക്യാമറ സ്ഥാപിച്ച ഭാഗത്ത് ആക്രമിച്ച ജീവി വീണ്ടും എത്തുമെന്നാണ് വനപാലകര് കരുതുന്നത്. പ്രദേശത്ത് കടുവയുടെ സാന്നിധ്യവുമുണ്ടെന്നാണ് പ്രദേശവാസികളുടെ സംശയം.
