കോന്നി: ആങ്ങമൂഴി – പ്ലാപ്പള്ളി റോഡിന്റെ വശങ്ങളില് സംരക്ഷണഭിത്തി നിര്മ്മിക്കുന്നതിനും ഐറിഷ് ഓട നിര്മ്മിക്കുന്നതിനും ആയി 1.45 കോടി രൂപ അനുവദിച്ചെന്ന് അഡ്വ. കെ യു ജനീഷ് കുമാര് എം എല് എ അറിയിച്ചു. ആറുകോടി രൂപ മുടക്കി 7 കിലോമീറ്റര് ദൈര്ഘ്യമുള്ള റോഡിന്റെ ഉന്നത നിലവാരത്തിലുള്ള ബി എം & ബി സി ടാറിങ് പ്രവര്ത്തി പൂര്ത്തീകരിച്ചിരുന്നു. ശബരിമല തീര്ത്ഥാടനവുമായി ബന്ധപ്പെട്ട് പ്ലാപ്പള്ളി – ആങ്ങമൂഴി റോഡിന്റെ നിര്മ്മാണ പ്രവര്ത്തി അഡ്വ.കെ.യു ജനീഷ് കുമാര് എംഎല്എയുടെ അഭ്യര്ത്ഥന പ്രകാരം പൊതുമരാമത്ത് മന്ത്രി മുഹമ്മദ് റിയാസ് നേരില് പോയി പരിശോധിക്കുകയും തീരുമാനങ്ങള് കൈക്കൊള്ളുകയും ചെയ്താണ് വാട്ടര് അതോറിറ്റിയുടെ പ്രവൃത്തിയുടെ ഭാഗമായി ദീര്ഘകാലം നിര്മ്മാണം മുടങ്ങിക്കിടന്ന റോഡിന്റെ പ്രവര്ത്തി പൂര്ത്തീകരിച്ചത്.
ഉന്നത നിലവാരത്തില് ടാറിങ് പൂര്ണമായും പൂര്ത്തീകരിച്ച റോഡിന്റെ വശങ്ങളില് സംരക്ഷണ ഭിത്തി നിര്മ്മിക്കുന്നതിനും ഓട നിര്മ്മിക്കുന്നതിനും പ്രത്യേകം തുക അനുവദിക്കണമെന്ന് എംഎല്എ മന്ത്രിയോട് അഭ്യര്ത്ഥിച്ചിരുന്നു. തുടര്ന്ന് ആങ്ങമൂഴി മുതല് പ്ലാപ്പള്ളി വരെ റോഡിന്റെ വശങ്ങളില് സംരക്ഷണഭിത്തി നിര്മ്മിക്കുന്നതിനും ഐറിഷ് ഓട നിര്മ്മിക്കുന്നതിനും ആയി 1.45 കോടി രൂപ അനുവദിച്ചു. ഐറിഷ് ഓട നിര്മ്മാണം പൂര്ത്തിയാകുന്നതോടെ നിലവില് അഞ്ചര മീറ്റര് ടാറിങ് വീതിയുള്ള റോഡിന് ഏഴു മീറ്ററില് അധികം വീതി വര്ദ്ധിക്കും. ഇതോടെ ശബരിമല തീര്ത്ഥാടകര്ക്ക് സുഗമമായി ഗതാഗത സൗകര്യം യാഥാര്ത്ഥ്യമാകും. ബന്ധപ്പെട്ട പൊതുമരാമത്ത് ഉദ്യോഗസ്ഥരുടെ യോഗം വിളിച്ചുചേര്ത്ത് പ്രവര്ത്തി ആരംഭിക്കാന് ആവശ്യമായ നിര്ദ്ദേശം നല്കുമെന്ന് എംഎല്എ അറിയിച്ചു.
