ഡെറാഡൂണ് : ഉത്തരാഖണ്ഡില് കൊല്ലപ്പെട്ട റിസപ്ഷനിസ്റ്റ് അങ്കിത ഭണ്ഡാരിയുടെ മൃതദേഹം സംസ്കരിച്ചു. ശ്രീനഗറില് അളകനന്ദ നദിയുടെ തീരത്തുള്ള എന്ഐടി ഘട്ടിലായിരുന്നു സംസ്കാരം നടത്തിയത്. അങ്കിത മരിച്ചതു ശ്വാസനാളത്തില് വെള്ളം കയറിയാണെന്ന പ്രാഥമിക പോസ്റ്റ്മോര്ട്ടം റിപ്പോര്ട്ടില് തൃപ്തരല്ലെന്നും അന്തിമ പോസ്റ്റ്മോര്ട്ടം റിപ്പോര്ട്ട് വരുന്നതുവരെ മൃതദേഹം സംസ്കരിക്കില്ലെന്നും നേരത്തേ കുടുംബം വ്യക്തമാക്കിയിരുന്നു.
തെളിവു നശിപ്പിക്കാനാണു റിസോര്ട്ട് പൊളിച്ചുനീക്കിയതെന്ന് അങ്കിതയുടെ സഹോദരന് അജയ് സിംഗ് ഭണ്ഡാരി കുറ്റപ്പെടുത്തി. പ്രമുഖ ബിജെപി നേതാവ് വിനോദ് ആര്യയുടെ മകനായ റിസോര്ട്ട് ഉടമ പുല്കിത് ആര്യയുടെ നേതൃത്വത്തില് അങ്കിതയെ കൊലപ്പെടുത്തി കനാലില് എറിയുകയായിരുന്നുവെന്നാണ് പോലീസ് പറഞ്ഞത്. ശനിയാഴ്ചയായിരുന്നു അങ്കിതയുടെ മൃതദേഹം ഋഷികേശിനു സമീപമുള്ള ചീല കനാലില്നിന്നു കണ്ടെടുത്തത്. ഋഷികേശ് എയിംസിലെ നാലു ഡോക്ടര്മാരാണു പോസ്റ്റ്മോര്ട്ടം നടത്തിയത്. മുറിവുകളുടെ വിശദാംശങ്ങളും മറ്റും അന്തിമ റിപ്പോര്ട്ടില് പുറത്തുവരും.
