വെച്ചൂച്ചിറ : ലഹരി വിരുദ്ധ പ്രചാരണത്തിന്റെ ഭാഗമായി വിഷ്വൽ ഡ്രാമയും ഫ്ലാഷ് മോബും അവതരിപ്പിച്ച് സ്കൂള് കുട്ടികള്. എണ്ണൂറാംവയൽ സിഎംഎസ് എൽപി സ്കൂളിലെ നല്ലപാഠം സ്കൂള് കുട്ടികളാണ് പരിപാടിയുടെ ഭാഗമായത്. സംസ്ഥാന സർക്കാരിന്റെ ലഹരി വിരുദ്ധ പ്രചാരണ പരിപാടികളുടെ ഭാഗമായിട്ടാണ് വെച്ചൂച്ചിറ ജനമൈത്രി പോലീസിന്റെ സഹകരണത്തോടെ കുട്ടികൾ പരിപാടികൾ അവതരിപ്പിച്ചത്.
മൊത്തം 50 കുട്ടികളാണ് പങ്കെടുത്തത്. വർധിച്ചു വരുന്ന ലഹരി വസ്തുക്കളുടെ ഉപയോഗവും വിൽപനയും തടയുന്നതിന് പോലീസ് ആവിഷ്കരിക്കുന്ന യോദ്ധാവ് ലഹരി വിരുദ്ധ ക്യാംമ്പയിന്റെ ഭാഗമായിട്ടാണ് പ്രചാരണം നടത്തിയത്. വെച്ചൂച്ചിറ പഞ്ചായത്ത് പ്രസിഡന്റ് ടി.കെ.ജയിംസ് പ്രചാരണം ഉദ്ഘാടനം ചെയ്തു. എഇഒ റോസമ്മ രാജൻ അധ്യക്ഷത വഹിച്ചു.
പഞ്ചായത്ത് സ്ഥിരംസമിതി അധ്യക്ഷ എസ്.രമാദേവി, അംഗങ്ങളായ രാജി വിജയകുമാർ, ഷാജി കൈപ്പുഴ, നഹാസ് പ്ലാമൂട്ടിൽ, എം.ജെ.ജിനു, വെച്ചൂച്ചിറ ഇൻസ്പെക്ടർ ജർലിൻ വി.സ്കറിയ, പ്രധാനാധ്യാപകൻ സാബു പുല്ലാട്ട്, എസ്ഐ സായിസേനൻ, ശ്യാം മോഹൻ, നിവാസ്, സി.കെ.ബിജുമോൻ, ഷൈനു ചാക്കോ, ഷൈനി ബോസ്, സജിമോൻ കടയനിക്കാട്, എം.ജെ.ബിബിൻ എന്നിവർ പ്രസംഗിച്ചു.
