കോന്നി : പുനലൂര് – മൂവാറ്റുപുഴ സംസ്ഥാന പാതയില് മുറിഞ്ഞകല് ജംഗ്ഷന് സമീപം റോഡില് രൂപപ്പെട്ട കുഴി അപകടക്കെണിയായി മാറിയിട്ടും നികത്തുവാന് നടപടി സ്വീകരിക്കാതെ കെ.എസ്.റ്റി.പി അധികൃതര്. കോടികള് മുടക്കി നിര്മ്മിച്ച സംസ്ഥാന പാതയില് കുഴി രൂപപ്പെട്ടിട്ട് കാലങ്ങള് ഏറെ കഴിഞ്ഞു. താത്കാലിക അറ്റകുറ്റപ്പണി നടത്തി കുഴി നികത്താന് ശ്രമം നടത്തിയെങ്കിലും ഇത് വീണ്ടും ഇളകി മാറുകയായിരുന്നു. ഇതിനോടകം നിരവധി ഇരുചക്ര വാഹനങ്ങള് ഇവിടെ അപകടത്തില്പ്പെട്ടിട്ടുണ്ട്. റോഡിന്റെ ഈ ഭാഗത്ത് പൊതുവേ വെള്ളം കെട്ടി നില്ക്കുന്നതിനാല് റോഡ് നിര്മ്മാണം നടക്കുന്ന സമയം തന്നെ റോഡ് മണ്ണിട്ട് ഉയര്ത്തിയാണ് ടാറിംഗ് പൂര്ത്തിയാക്കിയത്.
എന്നാല് ഇപ്പോഴും റോഡില് വെള്ളം കയറുന്നത് റോഡ് തകര്ച്ചയ്ക്ക് കാരണമാകുന്നുണ്ട്. ആധുനിക രീതിയില് ടാറിംഗ് പൂര്ത്തിയാക്കിയ റോഡില് ഇരുചക്ര വാഹനങ്ങള് ഉള്പ്പെടെ അമിത വേഗതയിലാണ് സഞ്ചരിക്കുന്നത്. കോന്നിയില് നിന്ന് പത്തനാപുരം ഭാഗത്തേക്കും തിരികെയും സഞ്ചരിക്കുന്ന ഇരുചക്ര വാഹനയാത്രക്കാര് തൊട്ടടുത്ത് എത്തുമ്പോഴാണ് റോഡിലെ കുഴി കാണുക. അപ്പോഴേക്കും അപകടവും സംഭവിച്ചിരിക്കും. റോഡില് പതിയിരിക്കുന്ന ഈ അപകടത്തെക്കുറിച്ച് നാട്ടുകാര് പരാതി പറഞ്ഞ് മടുത്തു. എന്നിട്ടും കുഴി നികത്താന് യാതൊരു നടപടിയും അധികാരികളുടെ ഭാഗത്ത് നിന്നും ഉണ്ടാകുന്നില്ല.
