തിരുവനന്തപുരം: രാജീവ് ഗാന്ധി ഏവിയേഷന് അക്കാദമിയില് പീഡന പരാതി നല്കി നാടുവിട്ട വിദ്യാര്ഥിനിയെ ഒരു ദിവസത്തെ തെരച്ചിലിനൊടുവില് കന്യാകുമാരിയില് കണ്ടെത്തി. പരിശീലനത്തിനിടെ ചീഫ് ഫ്ലൈയിങ് ഇന്സ്ട്രക്ടര് ലൈംഗിക ചൂഷണത്തിന് ശ്രമിച്ചെന്നായിരുന്നു വിദ്യാര്ഥിനിയുടെ പരാതി. കഴിഞ്ഞ ജനുവരിയിലായിരുന്നു സംഭവം. മാര്ച്ചില് പരാതി നല്കിയതിനെ തുടര്ന്ന് പോലീസ് കേസെടുത്തെങ്കിലും ഹൈക്കോടതി മുന്കൂര് ജാമ്യം നല്കിയതിനാല് പരിശീലകനെ അറസ്റ്റ് ചെയ്തിരുന്നില്ല.
പരാതിയില് കഴമ്പില്ലെന്ന നിലപാടിലായിരുന്നു ആഭ്യന്തര പരാതി പരിഹാര സമിതി. ഇതോടെ കടുത്ത മാനസിക സംഘര്ഷത്തിലായിരുന്നു പെണ്കുട്ടിയെന്നും പരാതി നല്കിയ ശേഷവും പീഡനം തുടര്ന്നതാണ് നാടുവിടാന് കാരണമെന്നും ബന്ധുക്കള് ആരോപിച്ചിരുന്നു. മജിസ്ട്രേറ്റിന് മുന്നില് ഹാജരാക്കിയ ശേഷം കുട്ടിയെ ബന്ധുക്കള്ക്കൊപ്പം വിടും.
