ചെന്നൈ: അഞ്ച് പെരുമ്പാമ്പുകളുമായി ഒരാളെ ചെന്നൈ വിമാനത്താവളത്തില് കസ്റ്റംസ് പിടികൂടി. പടിഞ്ഞാറന്, മധ്യ ആഫ്രിക്ക എന്നിവിടങ്ങളില് കാണാവുന്ന തരം പെരുമ്പാമ്പുകളുമായി ഡിണ്ടിഗല് സ്വദേശിയായ വിവേക് എന്നയാളെയാണ് പിടികൂടിയത്. തായ്ലന്ഡില് നിന്ന് കടത്തിയ ഇവയ്ക്ക് 50 ലക്ഷം രൂപയിലധികം വിലവരുമെന്ന് അധികൃതര് പറഞ്ഞു. ബോള് പൈത്തണ് എന്ന് അറിയപ്പെടുന്ന പെരുമ്പാമ്പുകളാണ് ഇവ. എന്തെങ്കിലും അപകടമോ ഭീഷണിയോ ഉണ്ട് എന്ന് തോന്നിയാല് അത് പന്ത് പോലെ ചുരുണ്ട് പോകും എന്നതിനാലാണ് ഈ പെരുമ്പാമ്പ്കള്ക്ക് ആ പേര് കിട്ടിയത്.
സെപ്റ്റംബര് രണ്ടിന് ചെന്നൈ വിമാനത്താവളത്തില് ഡ്യൂട്ടിയിലുണ്ടായിരുന്ന കസ്റ്റംസ് ഉദ്യോഗസ്ഥര്ക്ക് കിട്ടിയ രഹസ്യവിവരത്തിന്റെ അടിസ്ഥാനത്തില് യാത്രക്കാരുടെ ലഗേജുകള് പരിശോധിച്ചപ്പോഴാണ് കാര്ട്ടണ് ബോക്സുകളില് പായ്ക്ക് ചെയ്ത പെരുമ്പാമ്പുകളുമായി വിവേകിനെ പിടികൂടിയത്. കള്ളക്കടത്തുകാരാണ് തന്നെ പറ്റിച്ച് പാമ്പുകളെ കടത്താന് ശ്രമിച്ചതെന്നും പാമ്പുകളെ ചെന്നൈയില് എത്തുമ്പോള് ഒരാള്ക്ക് നല്കിയാല് പണം നല്കാമെന്ന് അവര് പറഞ്ഞതായും വിവേക് പറഞ്ഞു.