ബാലുശ്ശേരി : പാലോളിമുക്കിലെ ആള്ക്കൂട്ട മര്ദന കേസില് ലീഗ് പ്രവര്ത്തകന് പാലോളി കാവുങ്ങല് മുഹമ്മദ് നൗഫല് (31) ബാലുശ്ശേരി പോലീസ് മുമ്പാകെ കീഴടങ്ങി. സംഭവത്തെ തുടര്ന്ന് ഇയാള് ഒളിവിലായിരുന്നു. അറസ്റ്റ് ചെയ്ത് കോഴിക്കോട് സെഷന്സ് കോടതിയില് ഹാജരാക്കിയ പ്രതിയെ റിമാന്ഡ് ചെയ്തു. മുഖ്യപ്രതിയായ സഫീറും കഴിഞ്ഞദിവസം പോലീസിന് മുമ്പാകെ കീഴടങ്ങിയിരുന്നു. ഡി.വൈ.എഫ്.ഐ പാലോളി യൂനിറ്റ് സെക്രട്ടറി ജിഷ്ണു രാജിനെതിരെ നടന്ന ആള്ക്കൂട്ട മര്ദനവുമായി ബന്ധപ്പെട്ട് എസ്.ഡി.പി.ഐ, മുസ്ലിം ലീഗ്, ഡി.വൈ.എഫ്.ഐ പ്രവര്ത്തകരടക്കം ഇതോടെ 11 പേര് റിമാന്ഡിലായിട്ടുണ്ട്. ഒമ്പതുപേരുടെ ജാമ്യാപേക്ഷ കഴിഞ്ഞദിവസം ജില്ല സെഷന്സ് കോടതി തള്ളിയിരുന്നു.
