മലപ്പുറം : ജില്ലയില് അധിക പ്ലസ് ടു ബാച്ചുകളും പുതിയ പ്ലസ് ടു ബാച്ചുകളും അനുവദിക്കാന് സര്ക്കാരിന് ഹൈക്കോടതി നിര്ദ്ദേശം. സീറ്റുകളുടെ അപര്യാപ്ത കണക്കിലെടുത്താണ് പുതിയ ബാച്ചുകള് അനുവദിക്കാന് നടപടി സ്വീകരിക്കണമെന്ന് സര്ക്കാറിനോട് ഹൈകോടതി നിര്ദ്ദേശിച്ചത്. ഹയര് സെക്കന്ഡറി വിദ്യാഭ്യാസ മേഖലയില് ജില്ല കടുത്ത അസൗകര്യം നേരിടുന്നുവെന്ന് കോടതിയടക്കം കണ്ടെത്തിയ സാഹചര്യത്തിലാണിത്.
മലപ്പുറം ജില്ലയിലെ മൂന്നിയൂര് ഹയര് സെക്കന്ഡറി സ്കൂളില് രണ്ടു മാസത്തിനകം സയന്സ്, ഹ്യുമാനിറ്റീസ്, കൊമേഴ്സ് വിഷയങ്ങളില് മൂന്ന് അധിക ബാച്ചുകള് അനുവദിക്കണമെന്ന സിംഗിള് ബെഞ്ച് ഉത്തരവിനെതിരെ സര്ക്കാര് നല്കിയ അപ്പീല് തീര്പ്പാക്കിയാണ് ഡിവിഷന് ബെഞ്ചിന്റെ ഉത്തരവ്. ഹയര് സെക്കന്ഡറി പ്രവേശനത്തിന് മുന് വര്ഷങ്ങളില് ലഭിച്ച അപേക്ഷകളുടെ എണ്ണവും, വിദ്യാഭ്യാസ മേഖലയിലെ ആവശ്യങ്ങള് വിലയിരുത്താന് ചുമതലപ്പെടുത്തിയ സംസ്ഥാന തല സമിതിയുടെ ഏറ്റവും പുതിയ ശുപാര്ശകളും പരിഗണിച്ച് ഇക്കാര്യത്തില് ഉടനടി തീരുമാനമെടുക്കണമെന്നാണ് നിര്ദ്ദേശം.
