ദില്ലി: പ്രധാനമന്ത്രി നരേന്ദ്രമോദിയെക്കുറിച്ചുള്ള ബിബിസി ഡോക്യുമെന്ററി ‘ഇന്ത്യ: ദി മോദി ക്വസ്റ്റ്യന്‍’ സംപ്രേക്ഷണം ചെയ്ത ബിബിസിക്ക് സമന്‍സ്. ബിജെപി നേതാവ് ബിനയ് കുമാര്‍ സിംഗ് ഫയല്‍ ചെയ്ത അപകീര്‍ത്തി കേസിലാണ് കോടതി നടപടി. അഭിഭാഷകനായ മുകേഷ് ശര്‍മ്മ മുഖേന സമര്‍പ്പിച്ച ഹര്‍ജിയില്‍ രോഹിണി കോടതിയിലെ അഡീഷണല്‍ ജില്ലാ ജഡ്ജി രുചിക സിംഗ്ല സമന്‍സ് പുറപ്പെടുവിച്ചത്.
ആര്‍എസ്എസിനും വിശ്വഹിന്ദു പരിഷത്തിനുമെതിരെ ഡോക്യുമെന്ററിയില്‍ ഉന്നയിക്കുന്ന ആരോപണങ്ങള്‍ സംഘടനകളെയും അതിലെ അംഗങ്ങളെയും സന്നദ്ധപ്രവര്‍ത്തകരെയും അപകീര്‍ത്തിപ്പെടുത്താനുള്ള ദുരുദ്ദേശ്യത്താല്‍ പ്രേരിപ്പിച്ചതാണെന്ന് പരാതിയില്‍ പറയുന്നു. വിദേശ നാണയ വിനിമയ നിയന്ത്രണ ചട്ടം (ഫെമ) ലംഘിച്ചെന്ന് ആരോപിച്ച് നേരത്തെ ബിബിസിക്കെതിരെ എന്‍ഫോഴ്‌സ്‌മെന്റ് ഡയറക്ടറേറ്റ് കേസെടുത്തിരുന്നു. ബിബിസിയുടെ മുംബൈ, ഡല്‍ഹി ഓഫീസുകളില്‍ ആദായനികുതി വകുപ്പ് റെയ്ഡ് നടത്തിയിരുന്നു.
