ലക്നൗ : ഉത്തര്പ്രദേശില് നിയമസഭാ തെരഞ്ഞെടുപ്പ് പ്രചാരണം പൊടിപൊടിക്കുകയാണ്. വോട്ടെടുപ്പിന്റെ ആദ്യനാലു ഘട്ടം പൂര്ത്തിയായപ്പോള് അവശേഷിക്കുന്ന മൂന്ന് ഘട്ടങ്ങളില് സ്ഥാനാര്ത്ഥികള്ക്കു വേണ്ടിയുള്ള പ്രചാരണത്തിലാണ് രാഷ്ട്രീയ പാര്ട്ടി നേതാക്കളെല്ലാം. ഇതിനിടയില് യു.പിയില്നിന്നുള്ള കൗതുകകരമായൊരു വീഡിയോ ആണ് ഇപ്പോള് സമൂഹമാധ്യമങ്ങളില് വൈറലാകുന്നത്. കോണ്ഗ്രസ് നേതാവ് പ്രിയങ്ക ഗാന്ധിക്ക് കൈകൊടുക്കാനും സെല്ഫിയെടുക്കാനും ബി.ജെ.പി പ്രവര്ത്തകര് മത്സരിക്കുന്നതിന്റെ ദൃശ്യങ്ങളാണ് തെരഞ്ഞെടുപ്പ് ചൂടിനിടയിലും വേറിട്ട കാഴ്ചയായി മാറുന്നത്.
യു.പിയിലെ ഹര്ദോയിയിലുള്ള മദോഗഞ്ചില് തെരഞ്ഞെടുപ്പ് പ്രചാരണ പരിപാടിയില് പങ്കെടുത്തു മടങ്ങുന്നതിനിടെയായിരുന്നു പ്രിയങ്കയ്ക്ക് അപ്രതീക്ഷിത വരവേല്പ്പ് ലഭിച്ചത്. മല്ലാവന് ചൗക്കില് പ്രിയങ്കയുടെ വാഹനമെത്തിയപ്പോള് അവിടെ നിറയെ ബി.ജെ.പി പതാക പിടിച്ചും റിബ്ബണണിഞ്ഞും നില്ക്കുന്ന പ്രവര്ത്തകരായിരുന്നു. മല്ലാവനില് യു.പി മുഖ്യമന്ത്രി യോഗി ആദിത്യനാഥിന്റെ തെരഞ്ഞെടുപ്പ് പ്രചാരണയോഗം സമാപിച്ചത് തൊട്ടുമുന്പായിരുന്നു. പരിപാടി കഴിഞ്ഞ് പ്രവര്ത്തകര് പിരിഞ്ഞുപോകുന്നതിനിടെയായിരുന്നു അപ്രതീക്ഷിതമായി പ്രിയങ്കയുടെ വരവ്.
വാഹനം ആള്ക്കൂട്ടം തിരിച്ചറിഞ്ഞതോടെ എല്ലാവരും നേരെ അങ്ങോട്ട് തിരിഞ്ഞു. കാറിനു ചുറ്റും പൊതിഞ്ഞു. പിന്നീട് പ്രിയങ്കയുടെ കൈപിടിക്കാനും സെല്ഫിയെടുക്കാനുമുള്ള മത്സരമായിരുന്നു അവിടെ. ജയ് ശ്രീറാം മുഴക്കിയാണ് ബി.ജെ.പി പ്രവര്ത്തകര് കോണ്ഗ്രസ് നേതാവിന് അഭിവാദ്യമര്പ്പിച്ചത്. പ്രിയങ്ക ആരെയും നിരാശരാക്കിയില്ല. വാഹനത്തിന്റെ ഗ്ലാസ് തുറന്ന് ഡോറില് കയറിയിരുന്ന് പ്രിയങ്ക എല്ലാവര്ക്കും കൈകൊടുത്തു. അതിനിടയില് തെരഞ്ഞെടുപ്പ് പ്രചാരണത്തിനായി കോണ്ഗ്രസ് പുറത്തിറക്കിയ ലഘുലേഖ വിതരണം ചെയ്തപ്പോള് അതിനും ഉന്തുംതള്ളുമായിരുന്നു. ഒടുവില് ഏറെ പണിപ്പെട്ടാണ് ആള്ക്കൂട്ടത്തിനിടയില്നിന്ന് പ്രിയങ്കയ്ക്ക് മടങ്ങാനായത്.
