ചെങ്ങന്നൂര് : കനാലില് കുളിക്കാനിറങ്ങി കാണാതായ യുവാവിന്റെ മൃതദേഹം ഇന്ന് ഉച്ചക്ക് ശേഷം കണ്ടെത്തി. ചെങ്ങന്നൂര് കീഴ്ചേരിമേല് ഊടാകുളത്തും കരയില് ശശിധരന്റെ മകന് അനൂപ് (35) ആണ് മരിച്ചത്. ഇന്നലെ ഉച്ചക്ക് 12ന് മുളക്കുഴ കോട്ട ഗന്ധര്വ്വമുറ്റം ക്ഷേത്രത്തിന് സമീപം കുളിക്കാനിറങ്ങിയ യുവാവിനെ കാണാതാവുകയായിരുന്നു. മുളക്കുഴ പഞ്ചായത്ത് ജംഗ്ഷനില് എംസി റോഡിന് കുറുകെയുള്ള പാലത്തിന് സമീപം മൃതദേഹം ഇന്ന് പൊങ്ങുകയായിരുന്നു.
ഇയാള് ബൈക്ക് കനാലിന് സമീപം നിര്ത്തിയശേഷമാണ് കുളിക്കാനിറങ്ങിയത്. കുളിക്കാനിറങ്ങുന്നത് സമീപ വാസികള് ശ്രദ്ധിച്ചിരുന്നു. വൈകിട്ട് 5ന് ശേഷവും സ്ഥലത്ത് ബൈക്ക് ഇരിക്കുന്നതുകണ്ട പ്രദേശവാസികള് നടത്തിയ പരിശോധനയില് വസ്ത്രങ്ങളും മൊബൈലും കണ്ടെത്തി. ഇതേ തുടര്ന്ന് ചെങ്ങന്നൂര് ഫയര് ഫോഴ്സിനെ വിവരമറിയിച്ചു. സ്ഥലത്തെത്തിയ ഫയര് ഫോഴ്സ് രാത്രി വൈകിയും തിരച്ചില് തുടര്ന്നെങ്കിലും മൃതദേഹം കണ്ടെത്താനായില്ല. മൃതദേഹം ചെങ്ങന്നൂരിലെ സ്വകാര്യ ആശുപത്രിയില് മോര്ച്ചറിയില് സൂക്ഷിച്ചിരിക്കുന്നു. അമ്മ – ലീലാഭായി. സഹോദരി – അനുപമ.
