കൊച്ചി: കാമുകിയുടെ 23 പവന് സ്വര്ണം തട്ടിയ കേസില് കാമുകനും സുഹൃത്തും അറസ്റ്റില്. ആമയുടെ പുറത്ത് പണം വെച്ചാല് ഇരട്ടിക്കുമെന്ന് പറഞ്ഞു വിശ്വസിപ്പിച്ചാണ് കാമുകിയുടെ 23 പവന് സ്വര്ണം തട്ടിയെടുത്തത്. സംഭവത്തില് ഇടുക്കി ചുരുളിപതാല് ആല്പ്പാറ മുഴയില് വീട്ടില് കിച്ചു ബെന്നി(23), രാജസ്ഥാന് മിലാക്പൂര് സ്വദേശി വിശാല് മീണ (28) എന്നിവരാണ് പിടിയിലായത്. എറണാകുളത്ത് ജോലി ചെയ്യുന്ന ഇടുക്കി സ്വദേശിനിയുടെ പരാതിയിലാണ് അറസ്റ്റ്.
കിച്ചുവിന്റെ കാമുകിയായാണ് പരാതി നല്കിയത്. യുവതിയെ പറഞ്ഞു വിശ്വസിപ്പിച്ച് ഇയാള് അവരുടെ 23 പവന് സ്വര്ണാഭരണങ്ങള് തട്ടിയെടുക്കുകയായിരുന്നു. സംഭവം നടക്കുന്നതിന് ഏതാനും ദിവസം മുമ്പ് വിശാല് മീണക്ക് പണം ഇരട്ടിപ്പിക്കാനുള്ള കഴിവുണ്ടെന്നും സ്വര്ണം നല്കിയാല് സമാനമായി ചെയ്തു തരുമെന്ന് കിച്ചു യുവതിയെ വിശ്വസിപ്പിച്ചു. ഇത് വിശ്വസിച്ച് മട്ടാഞ്ചേരിയില് വെച്ച് സ്വര്ണം കൈമാറിയശേഷം മൂവരും കാറില് എറണാകുളത്തേക്ക് വരുന്നതിനിടെ സിഗരറ്റ് വാങ്ങാന് കിച്ചു കാര് നിര്ത്തി പുറത്തിറങ്ങി. ഈ തക്കം നോക്കി വിശാല് സ്വര്ണവുമായി മുങ്ങുകയായിരുന്നു.
