തിരുവനന്തപുരം : അടുത്ത സാമ്പത്തിക വര്ഷത്തെ സംസ്ഥാന ബജറ്റ് ധനമന്ത്രി കെ.എന് ബാലഗോപാല് നിയമസഭയില് അവതരിപ്പിക്കുന്നു. ആഗോള സമാധാന സെമിനാറിന് 2 കോടി അനുവദിച്ചു. കേരളത്തെ കൂടുതല് മുന്നോട്ടുനയിക്കുന്ന സമീപനങ്ങളാകും ബജറ്റിലുണ്ടാകുകയെന്ന് ധനമന്ത്രി നേരത്തേ വ്യക്തമാക്കിയിരുന്നു. ത്വരിത വികസനത്തിനൊപ്പം കാല് നൂറ്റാണ്ടില് കേരളത്തെ വികസിത രാഷ്ട്രങ്ങളുടെ നിലവാരത്തിലേക്ക് ഉയര്ത്താനുള്ള കര്മപരിപാടികള്ക്കാണ് സര്ക്കാര് രൂപം നല്കുന്നത്. വൈജ്ഞാനിക സമ്പദ്വ്യവസ്ഥയെ ഉപയോഗപ്പെടുത്തി കൂടുതല് തൊഴിലും ഉല്പ്പാദനവും ലക്ഷ്യമിടുന്നു.
കൃഷി, വ്യവസായം, മൂല്യവര്ധിത ഉല്പ്പന്ന നിര്മ്മാണം തുടങ്ങിയ മേഖലകളിലെല്ലാം കുതിച്ചുചാട്ടമുണ്ടാക്കണം. വിഭവങ്ങളെ പരമാവധി പ്രയോജനപ്പെടുത്താനാകുന്ന പദ്ധതികള് രൂപപ്പെടുത്തണം. നല്ല മണ്ണും ജലവും വെളിച്ചവും തൊഴില് വൈദഗ്ധ്യവും മനുഷ്യവിഭവവും ഫലപ്രദമായി ഉപയോഗിക്കുന്നതിനാകും മുന്ഗണന. എല്ലാ സാധ്യതയും പ്രയോജനപ്പെടുത്തി സമഗ്രവും സര്വതല സ്പര്ശിയുമായ വികസനമാണ് ലക്ഷ്യമിടുന്നതെന്നും ധനമന്ത്രി വ്യക്തമാക്കി.
