കാഞ്ഞങ്ങാട്: ബസ് പുറപ്പെടേണ്ട സമയത്തെച്ചൊല്ലി ബസ് ജീവനക്കാര് തമ്മില് കൈയ്യാങ്കളിയിലെത്തിയതിന് പിന്നാലെ ബസുകള് പിടിച്ചെടുത്ത് പോലീസ്. കാഞ്ഞങ്ങാട്-പാണത്തൂര് റൂട്ടില് ഒടുന്ന ബസുകളിലെ ജീവനക്കാര് ആണ് തമ്മിലടിച്ചത്. മൂന്നുതവണയാണ് ബസ് ജീവനക്കാര് തമ്മിലടിച്ചത്. ഇതോടെ ബസുകള് പൊലീസ് കസ്റ്റഡിയിലെടുത്തു. കുടജാദ്രി, അല്മാസ് ബസിലെ ജീവനക്കാരാണ് തമ്മില് ഏറ്റുമുട്ടിയത്. വ്യാഴാഴ്ച രാവിലെ 11 ഓടെയാണ് കേസിനാസ്പദമായ സംഭവം. കാഞ്ഞങ്ങാട് ബസ്സ്റ്റാന്ഡില് വെച്ച് സമയത്തെചൊല്ലി ഇരുബസിലേയും ജീവനക്കാര് തമ്മില് ആദ്യ വാക്കേറ്റവും കൈയാങ്കളിയും നടന്നു. ഇതിനിടയില് കുടജാദ്രി ബസിലെ ജീവനക്കാര് അല്മാസിലെ ജീവനക്കാരെ മര്ദിക്കുകയും ചെയ്തു.
മറ്റു ബസുകളിലെ ജീവനക്കാര് ഇരുകൂട്ടരെയും അനുനയിപ്പിച്ച് അയച്ചു. എന്നാല് തങ്ങളെ കൈയേറ്റം ചെയ്ത കുടജാദ്രി ബസിലെ ജീവനക്കാരെ ഉച്ചകഴിഞ്ഞ് പാണത്തൂര് ബസ്സ്റ്റാന്ഡില് വെച്ച് അല്മാസിലെ ജീവനക്കാര് തിരിച്ച് കൈയേറ്റം ചെയ്തു. സംഭവമറിഞ്ഞ് സ്ഥലത്തെത്തിയ രാജപുരം പോലീസ് ബസില് യാത്രക്കാരുള്ളതിനാല് ഇരുവരേയും അനുനയിപ്പിച്ച് പറഞ്ഞുവിട്ടു. എന്നാല് പാണത്തൂരില് നിന്ന് കാഞ്ഞങ്ങാട്ടേക്ക് തിരിച്ചുവരികയായിരുന്ന അല്മാസ് ബസിനെ കുടജാദ്രി ബസിന്റെ ഉടമയുടെ നാടായ അട്ടേങ്ങാനത്തു വെച്ച് ഒരുസംഘമാളുകള് തടഞ്ഞുനിര്ത്തി യാത്രക്കാരെ ഇറക്കിവിടുകയും ജീവനക്കാരെ കൈയേറ്റം ചെയ്യുകയും ചെയ്തു. ഇതേത്തുടര്ന്നാണ് രാജപുരം പോലീസ് ഒരു ബസും അമ്പലത്തറ പോലീസ് മറ്റൊരു ബസും കസ്റ്റഡിയിലെടുത്തത്.
