പത്തനംതിട്ട : സംഘര്ഷംകണ്ട് ഭയന്ന് ഓടുന്നതിനിടെ നരിയാപുരം സ്വദേശിനിയായ യാത്രക്കാരിയുടെ കുഞ്ഞിന് വീണ് പരിക്കേറ്റു. വ്യാഴാഴ്ച ഉച്ചക്ക് ഒന്നിനാണ് സംഭവം. 20ഓളം വരുന്ന സംഘം ചേരിതിരിഞ്ഞ് യാത്രക്കാര് നില്ക്കുന്ന ഭാഗത്തെത്തി ഏറ്റുമുട്ടുകയായിരുന്നു. ഇവിടെ പോലീസ് ഉണ്ടായിരുന്നില്ല. കൂടുതല് പേരും ഹെല്മെറ്റ് ധരിച്ചാണ് എത്തിയതെന്ന് യാത്രക്കാര് പറഞ്ഞു. സ്റ്റാന്ഡിന്റെ ഒരു ഭാഗത്ത് സൂക്ഷിച്ചിരുന്ന പഴയ മണ്വെട്ടിയും ഇരുമ്പ്കമ്പികളും ആക്രമണത്തിന് ഉപയോഗിച്ചതായും യാത്രക്കാര് പറഞ്ഞു. പുറത്ത് ബൈക്ക് വെച്ചശേഷമാണ് സംഘം സ്റ്റാന്ഡിലെത്തിയത്. അടികണ്ട് ഭയന്ന് ഓടി മാറിയപ്പോഴാണ് യാത്രക്കാരിയുടെ കുഞ്ഞിന് വീണ് പരിക്കേറ്റത്. വിവരം അറിഞ്ഞ് പോലീസ് എത്തിയപ്പോഴെക്കും സംഘം സ്ഥലം വിട്ടു. അരമണിക്കൂറിനുശേഷം ഓപ്പണ് സ്റ്റേജ് ഭാഗത്ത് വീണ്ടും ഇവര് സംഘടിച്ചു.
ഫോണില് വിളിച്ച് പുറത്തുനിന്ന് കൂടുതല് ആളുകളെ വരുത്താനും ശ്രമിച്ചു. വ്യാപാരികള് ഈ വിവരം പോലീസിനെയും അറിയിച്ചു. മിക്ക സമയത്തും സ്റ്റാന്ഡില് പോലീസിനെ കാണില്ല. രണ്ടാഴ്ചയായി ഇവിടെ സ്ഥിരമായി സംഘര്ഷം നടക്കുന്നതായി വ്യാപാരികള് പറഞ്ഞു. മുമ്പും ഇവിടെ വിദ്യാര്ഥികള് തമ്മില് വലിയ ഏറ്റുമുട്ടല് നടന്നിട്ടുണ്ട്. കഞ്ചാവ് വില്പനയുമായി ബന്ധപ്പെട്ട തര്ക്കങ്ങളാണ് സംഘര്ഷത്തിന് കാരണമെന്ന് പറയുന്നു. സാമൂഹിക വിരുദ്ധ ശല്യം വര്ധിച്ചതോടെ സ്റ്റാന്ഡില് കയറാന് ഇപ്പോള് യാത്രക്കാര്ക്ക് ഭയമാണ്. നാളുകളായി കഞ്ചാവ് കച്ചവടത്തിന്റെ കേന്ദ്രമായി ഇവിടം മാറിയിട്ടുണ്ട്. അന്തര് സംസ്ഥാന തൊഴിലാളികളാണ് ഇവരുടെ ഏജന്റുമാരായി വരുന്നത്. ചൊവ്വാഴ്ച രാത്രിയും 30ഓളം ബൈക്കുകളില് എത്തിയ യുവാക്കള് നഗരത്തില് ഭീകരാന്തരീക്ഷം സൃഷ്ടിച്ചിരുന്നു. പോലീസ് എത്തിയാണ് വിരട്ടി ഓടിച്ചത്.
