പത്തനംതിട്ട : കനറാ ബാങ്കില്നിന്ന് എട്ടു കോടിയിലേറെ രൂപ തട്ടിയെടുത്ത ജീവനക്കാരന് വിജീഷ് വര്ഗീസ് രാജ്യം വിടാനുള്ള സാധ്യത മുന്നില് കണ്ട് പോലീസ് ലുക്ക് ഔട്ട് നോട്ടീസ് പുറപ്പെടുവിച്ചു. രാജ്യത്തെ എല്ലാ വിമാനത്താവളങ്ങളിലും തുറമുഖങ്ങളിലും ജാഗ്രത നിര്ദ്ദേശം പുറപ്പെടുവിപ്പിച്ച് കഴിഞ്ഞു.
ഭാര്യയെയും രണ്ടും നാലും വയസ്സ് വീതമുള്ള മക്കളെയും ഒപ്പം കൂട്ടിയാണ് പ്രതി നാടുവിട്ടത്. ഇതില് വിജീഷ് വര്ഗീസിനൊഴികെ മറ്റ് മൂന്നുപേര്ക്കും പാസ്പോര്ട്ട് ഇല്ല. പിടിക്കപ്പെടാതിരിക്കാനുള്ള അവസാന ശ്രമമെന്ന നിലയില് ഇയാള് തനിച്ച് രാജ്യം വിടാനുള്ള സാധ്യതയും പോലീസ് തള്ളിക്കളയുന്നില്ല.
അതിനിടെ അന്വേഷണം ക്രൈംബ്രാഞ്ചിന് കൈമാറാന് ജില്ലാ പോലീസ് മേധാവിയുടെ ശുപാര്ശ. ബാങ്കുകളുമായി ബന്ധപ്പെട്ട ക്രമക്കേടും മൂന്ന് കോടിക്കുമേല് നഷ്ടപ്പെട്ട സംഭവവുമായതിനാല് സംഭവം സംസ്ഥാന ക്രൈംബ്രാഞ്ചിന്റെ അന്വേഷണപരിധിയില് വരുന്നതാണെന്ന് ജില്ലാ പോലീസ് മേധാവി ആര്.നിശാന്തിനി സംസ്ഥാന പോലീസ് മേധാവിക്ക് റിപ്പോര്ട്ട് നല്കി.