ന്യൂഡല്ഹി : സർക്കാരുകളെ വിമർശിച്ച് സുപ്രീംകോടതി ചീഫ് ജസ്റ്റിസ് എന് വി രമണ. സര്ക്കാരുകള് ശരിയായി പ്രവര്ത്തിച്ചാല് കോടതിക്ക് ഇടപെടേണ്ടി വരില്ലെന്ന് മുഖ്യമന്ത്രിമാരുടെയും ഹൈക്കോടതി ചീഫ് ജസ്റ്റിസുമാരുടെയും സംയുക്ത സമ്മേളനത്തില് ചീഫ് ജസ്റ്റിസ് പറഞ്ഞു. അന്യായ അറസ്റ്റും പീഡനവും നിര്ത്തിയാല് കോടതി ഇടപെടല് കുറയ്ക്കാം. കോടതി ഉത്തരവുകള് നടപ്പാക്കാന് സര്ക്കാരുകള് കാലതാമസം വരുത്തുന്നെന്നും ചീഫ് ജസ്റ്റിസ് ആരോപിച്ചു.
പ്രധാനമന്ത്രി നരേന്ദ്ര മോദിയാണ് സംയുക്ത സമ്മേളനം ഉദ്ഘാടനം ചെയ്തത്. ജുഡീഷ്യല് സംവിധാനം കൂടുതല് ശക്തിപ്പെടുത്തണമെന്ന് പ്രധാനമന്ത്രി നരേന്ദ്ര മോദി പറഞ്ഞു. കോടതികളിലെ ഒഴിവുകള് നികത്തും. കാലഹരണപ്പെട്ട നിയമങ്ങള് ഉപേക്ഷിക്കണം. കോടതി നടപടികളില് കൂടുതല് സാങ്കേതിക സംവിധാനങ്ങള് ഏര്പ്പെടുത്തണമെന്നും പ്രധാനമന്ത്രി പറഞ്ഞു. കോടതി വ്യവഹാരങ്ങള് പ്രാദേശിക ഭാഷകളിലാക്കുന്നത് പ്രോത്സാഹിപ്പിക്കേണ്ടതാണ്. നീതിന്യായ വ്യവസ്ഥയിലുള്ള ജനങ്ങളുടെ വിശ്വാസം ഇത് വര്ധിപ്പിക്കുമെന്നും പ്രധാനമന്ത്രി പറഞ്ഞു. ആറ് വർഷത്തിന് ശേഷമാണ് സംയുക്ത സമ്മേളനം വീണ്ടും നടക്കുന്നത്. മുഖ്യമന്ത്രി പിണറായി വിജയൻ അമേരിക്കയിൽ ചികിത്സയിലായതിനാൽ കേരളത്തെ പ്രതിനിധീകരിച്ച് നിയമമന്ത്രി പി രാജീവാണ് യോഗത്തില് പങ്കെടുക്കുന്നത്.
