കൊച്ചി : ഡൽഹിയിൽ വിദ്യാർഥികൾക്ക് നേരെ നടന്ന പോലീസ് അതിക്രമത്തിനെതിരെ ചൊവ്വാഴ്ച്ച അർദ്ധരാത്രി കൊച്ചി ക്യൂൻസ് വാക്ക് വേയിൽ കാൻഡിൽ ലൈറ്റ് പ്രതിഷേധം നടന്നു. ഇൻസ്റ്റഗ്രാമിലൂടെയുണ്ടായ ആഹ്വാനത്തെ തുടർന്ന് നൂറോളം പേരാണ് കറുത്ത വസ്ത്രങ്ങൾ ധരിച്ച് കൈയിൽ മെഴുകുതിരികളും പ്ലക്കാർഡുകളുമായി ഒത്തുകൂടിയത്. രാഷ്ട്രീയ പാർട്ടികളുടെ പ്രതിനിധികളെ ഒന്നും ഉൾപ്പെടുത്താതെയായിരുന്നു പ്രതിഷേധം. ആസാദി എന്ന ഗ്രൂപ്പിലൂടെയാണ് പരസ്പരം ഇതുവരെ കാണാത്തവർ പോലും പ്രതിഷേധിക്കാൻ എത്തിയത്. ആഹ്വാനം വാട്സ് ആപ്പ് സ്റ്റാറ്റസും ഇൻസ്റ്റാഗ്രാം സ്റ്റോറിയുമാക്കിയതോടെയാണ് വൈറൽ ആയി മാറിയത്. സമാധാനപരമായിരുന്നു അർദ്ധരാത്രിയിലെ പ്രതിഷേധം.
ദേശവിരുദ്ധ മുദ്രാവാക്യങ്ങളോ പ്രസംഗങ്ങളോ പാടില്ലെന്ന് കൂട്ടായ്മ തീരുമാനമെടുത്തിരുന്നു. വിദ്യാർഥികളുടെ കൂട്ടായ്മ എന്നാണ് ഉദ്ദേശിച്ചതെങ്കിലും വിദ്യാർഥികൾ അല്ലാത്തവരും കൂട്ടായ്മയിലുണ്ടായിരുന്നു. വിദ്യാർഥികൾക്ക് നേരെ നടന്ന അതിക്രമത്തിനെതിരേ ക്യൂൻസ് വാക്ക് വേയിൽ ആൺകുട്ടികളും പെൺകുട്ടികളും പ്രസംഗിച്ചു. ഡൽഹി അതിക്രമം നേരിട്ടു കണ്ടവർ വരെ ആ കൂട്ടത്തിലുണ്ടായിരുന്നു. ചൊവ്വാഴ്ച്ച രാത്രി 12 ന് തുടങ്ങിയ പ്രതിഷേധം ഒരുമണിയോടെ അവസാനിപ്പിച്ചു.
