പത്തനംതിട്ട: കോണ്ഗ്രസ് ഹാഥ് സെ ഹാഥ് യാത്രയ്ക്ക് നേരെ മുട്ടയേറ് നടത്തിയ ഡിസിസി ജനറല് സെക്രട്ടറി എം സി ഷെരീഫിനെതിരെ അച്ചടക്ക നടപടി. ഇയാളെ പാര്ട്ടിയില് നിന്ന് സസ്പെന്റ് ചെയ്തു. കെപിസിസി ജനറല് സെക്രട്ടറിയും എഐസിസി സെക്രട്ടറിയും പങ്കെടുത്ത ജാഥയ്ക്ക് നേരെയാണ് പത്തനംതിട്ട ഡിസിസി ജനറല് സെക്രട്ടറി എം സി ഷെരീഫ് മുട്ടയെറിഞ്ഞത്. പത്തനംതിട്ടയില് ഹാഥ് സെ ഹാഥ് ജാഥയുടെ തുടക്കത്തില് വച്ച് തന്നെ കോണ്ഗ്രസിലെ തമ്മില് തല്ലും ആരംഭിച്ചിരിക്കുന്നത്. വലഞ്ചുഴിയില് നിന്ന് ജാഥ തുടങ്ങിയപ്പോളാണ് ജാഥയ്ക്ക് നേരേ മുട്ടയേറുമായി കോണ്ഗ്രസ് പ്രവര്ത്തകര് തന്നെ രംഗത്തെ എത്തിയത്.
എം സി ഷെരീഫിനെ നേരത്തെയുണ്ടായിരുന്ന എല്ലാ ചുമതലകളില് നിന്നും നീക്കി. ഡിസിസി ജനറല് സെക്രട്ടറിയുടേത് അച്ചടക്കലംഘനമാണെന്നാണ് പാര്ട്ടി വിലയിരുത്തല്. ഗുരുതര തെറ്റ് ബോധ്യപ്പെട്ട സാഹചര്യത്തിലാണ് നടപടിയെന്നും കെപിസിസി പ്രസിഡന്റ് അറിയിച്ചു. കെപിസിസി ജനറല് സെക്രട്ടറി എം എം നസീര്, എഐസിസി സെക്രട്ടറി വിശ്വനാഥ പെരുമാള് തുടങ്ങിയവര് പങ്കെടുത്ത ജാഥയ്ക്ക് നേരെയാണ് മുട്ട എറിഞ്ഞത്. എം എം നസീറിന്റെ വാഹനത്തിന് നേരെയും എം സി ഷെരീഫിന്റെ അനുകൂലികള് കല്ലെറിഞ്ഞു. മദ്യപിച്ച് എത്തിയ ഷെരീഫ് ജാഥയക്ക് നേരെ ആക്രമം നടത്തുകയായിരുന്നു എന്നാണ് ഔദ്യോഗിക വിശദീകരണം.