കാഠ്മണ്ഡു: യോഗഗുരു ബാബ രാംദേവിന്റെ പതജ്ഞലി പുറത്തിറക്കിയ കോവിഡ് പ്രതിരോധ മരുന്നായ കോറോണിലിന്റെ വിതരണം നിര്ത്തിവെച്ച് നേപ്പാള്. അതെസമയം കോറോണില് നിരോധിച്ചതായി ഔദ്യോഗിക ഉത്തരവൊന്നും പുറപ്പെടുവിച്ചിട്ടില്ലെന്ന് നേപ്പാള് ആരോഗ്യമന്ത്രാലയം വക്താവ് പറഞ്ഞു.
മതിയായ മാനദണ്ഡങ്ങള് പാലിക്കാതെയാണ് 1500 കോറോണില് കിറ്റുകള് വിതരണത്തിനെത്തിച്ചതെന്നായിരുന്നു പുറത്ത് വന്ന വാര്ത്തകള്. ഇന്ത്യന് മെഡിക്കല് അസോസിയേഷന്റെ കോറോണിലിനെതിരായ വിമര്ശനവും നിലപാടും നേപ്പാളിന്റെ തീരുമാനത്തിന് കരുത്തേകിയിരുന്നു. അതെ സമയം നേരത്തെ ഭൂട്ടാനും കോറോണില് കിറ്റ് വിതരണം ചെയ്യുന്നത് നിര്ത്തിയിരുന്നു.
നേപ്പാള് സര്ക്കാര് മരുന്ന് നിരോധിച്ചതായി യാതൊരു ഔദ്യോഗിക ഉത്തരവും പുറപ്പെടുവിച്ചിട്ടില്ലെന്ന് ആരോഗ്യമന്ത്രാലയം വക്താവായ ഡോ. കൃഷ്ണ പ്രസാദ് പൗഡ്യാല് പറഞ്ഞു. രാജ്യത്ത് പൊതുജനങ്ങള്ക്കിടയില് വിതരണം ചെയ്യാനുള്ള എല്ലാ മരുന്നുകളും ആരോഗ്യ മന്ത്രാലയത്തിന് കീഴിലുള്ള ഡിപ്പാര്ട്ട്മെന്റ് ഓഫ് ഡ്രഗ് അഡ്മിനിസ്ട്രേഷന് കീഴില് രജിസ്റ്റര് ചെയ്യണമെന്ന് അദ്ദേഹം അറിയിച്ചു.
നേപ്പാള് ആരോഗ്യ മന്ത്രിയായിരുന്ന ഹൃദയേഷ് ത്രിപാഠിക്ക് ഒരു പാക്കറ്റ് കോറോണില് സമ്മാനമായി നല്കിയതായി അറിഞ്ഞതല്ലാതെ ഇതേപ്പറ്റി തനിക്ക് കൂടുതല് ഒന്നും അറിയില്ലെന്ന് ഡോ. കൃഷ്ണ പ്രസാദ് പൗഡ്യാല് പറഞ്ഞു.
പ്രതിരോധ ശക്തി വര്ധിപ്പിക്കാന് സഹായിക്കുന്ന നിരവധി ആയുര്വേദ മരുന്നുകള് നേപ്പാളിലുണ്ട്. എന്നാല് ലോകാരോഗ്യ സംഘടന ഇതുവരെ കോവിഡിനെതിരെ ഒരു മരുന്നിനും അംഗീകാരം നല്കിയിട്ടില്ലെന്ന് പൗഡ്യാല് വ്യക്തമാക്കി.
ഇന്ത്യയില് കോവിഡ് ആദ്യ തരംഗം വ്യാപിച്ച സാഹചര്യത്തില് ജൂണ് 23 നാണ് ബാബാ രാംദേവ് ആയുര്വേദ മരുന്നായ’ കോറോണില് ‘പുറത്തിറക്കിയത്. അടുത്തിടെ ഉത്തരാഖണ്ഡ് സര്ക്കാര് വിതരണം ചെയ്യുന്ന കോവിഡ് കിറ്റില് കൊറോണില് ഉള്പ്പെടുത്തുമെന്ന അഭ്യൂഹം ശക്തമായിരിക്കെ ഇന്ത്യന് മെഡിക്കല് അസോസിയേഷന് പരാതിയുമായി രംഗത്തെത്തിയിരുന്നു.
