ചിങ്ങവനം: നാട്ടകത്ത് നിയന്ത്രണംവിട്ട ലോറി ഇടിച്ച്‌ സ്കൂട്ടര്‍ യാത്രക്കാരായ ദമ്പതികള്‍ മരിച്ചു. മറിയപ്പള്ളി പുത്തന്‍മഠത്തില്‍ സുദര്‍ശനന്‍ (61), ഭാര്യ ഷൈലജ (56) എന്നിവരാണു മരിച്ചത്. ഇന്നലെ ഉച്ചയ്ക്ക് ഒന്നിന് എംസി റോഡില്‍ മറിയപ്പള്ളിയിലാണ് അപകടം. പള്ളത്തെ വാടകവീട്ടില്‍നിന്നു കുടുംബവീട്ടിലേക്ക് ആക്ടീവ സ്കൂട്ടറില്‍ വരികയായിരുന്നു ദമ്പതികള്‍. ഈ സമയം കോട്ടയം ഭാഗത്തുനിന്നു വന്ന ലോറി ദിശ മാറി ആദ്യം മുന്നിലുണ്ടായിരുന്ന കാറിലും പിന്നീട് ഇവര്‍ സഞ്ചരിച്ചിരുന്ന സ്കൂട്ടറിലും ഇടിക്കുകയായിരുന്നു. ഇടിയുടെ ആഘാതത്തില്‍ റോഡിലേക്ക് തെറിച്ചുവീണ ഷൈലജ തല്‍ക്ഷണം മരിച്ചു.
ഓടിക്കൂടിയ നാട്ടുകാര്‍ ചേര്‍ന്ന് സുദര്‍ശനെ ജില്ലാ ആശുപത്രിയിലും പിന്നീട് മെഡിക്കല്‍ കോളേജാശുപത്രിയിലും എത്തിച്ചെങ്കിലും ജീവന്‍ രക്ഷിക്കാനായില്ല. അപകടത്തെ തുടര്‍ന്ന് ചിങ്ങവനം പോലീസ് സ്ഥലത്തെത്തി മേല്‍നടപടികള്‍ സ്വീകരിച്ചു. സംഭവത്തെ തുടര്‍ന്ന് എംസി റോഡില്‍ വന്‍ ഗതാഗതകുരുക്കും ഉണ്ടായി. വിമുക്ത ഭടനായ സുദര്‍ശനന്‍ കുമരകം കാര്‍ഷിക വികസന കേന്ദ്രത്തില്‍ സെക്യൂരിറ്റിയായി ജോലി ചെയ്യുകയായിരുന്നു. മക്കള്‍: ശരത്ത്, സുധീഷ് (ഇരുവരും ദുബായ്). മരുമക്കള്‍: അഞ്ജലി, നിമിഷ (ഇരുവരും ദുബായ്).
