കൊച്ചി : കുഞ്ഞിനെ ഉപേക്ഷിച്ചുകടന്നെന്ന കള്ളക്കേസില് യുവതിയെയും സഹപ്രവര്ത്തകനെയും അറസ്റ്റുചെയ്ത് ജയിലിലടച്ച സംഭവത്തില് എറണാകുളം എളമക്കര പോലീസ് സ്റ്റേഷനിലെ എസ്.ഐയ്ക്കെതിരായ കോടതിയലക്ഷ്യ ഹര്ജി ഫയലില് സ്വീകരിച്ച ഹൈക്കോടതി എസ്.ഐ ഫൈസലിന് നോട്ടീസ് നല്കാന് നിര്ദ്ദേശിച്ചു. യുവതിയുടെ വിശദീകരണം കേള്ക്കാതെ ഇവരെ റിമാന്ഡ് ചെയ്ത ജുഡിഷ്യല് ഫസ്റ്റ്ക്ളാസ് മജിസ്ട്രേട്ടില്നിന്ന് റിപ്പോര്ട്ട്തേടാനും ജസ്റ്റിസ് അലക്സാണ്ടര് തോമസ്, ജസ്റ്റിസ് ശോഭ അന്നമ്മ ഈപ്പന് എന്നിവരുള്പ്പെട്ട ഡിവിഷന്ബെഞ്ച് ഉത്തരവിട്ടു. കോടതിയലക്ഷ്യ ഹര്ജി ജൂലായ് ഏഴിന് വീണ്ടും പരിഗണിക്കും.
വിവാഹമോചിതയായ യുവതി പത്തുമാസം പ്രായമുള്ള കുഞ്ഞുമായി തന്റെ അമ്മയ്ക്കൊപ്പമായിരുന്നു താമസം. അമ്മയുടെ അടുപ്പക്കാരനായ വ്യക്തി തന്നെ ലൈംഗികമായി ഉപദ്രവിക്കുന്നെന്ന് പരാതി പറഞ്ഞിട്ടും അമ്മ ഇടപെടാതിരുന്നതോടെ യുവതി സഹപ്രവര്ത്തകനായ യുവാവുമായി കമ്മീഷണര് ഓഫീസിലെത്തി പരാതി നല്കി. സംഭവം അറിഞ്ഞ അമ്മ യുവതിയോട് വീട്ടില്കയറരുതെന്ന് ഭീഷണിപ്പെടുത്തിയതോടെ യുവതിക്ക് സഹപ്രവര്ത്തകനൊപ്പം പോകേണ്ടി വന്നു. തുടര്ന്ന് മകളെ കാണാനില്ലെന്ന് പറഞ്ഞ് അമ്മ പോലീസിലും യുവതി കുഞ്ഞിനെ ഉപേക്ഷിച്ച് കടന്നുകളഞ്ഞെന്ന് ശിശുക്ഷേമസമിതിക്കും പരാതി നല്കി.
