പത്തനംതിട്ട : ഇറ്റലിയില് നിന്നു വന്ന റാന്നിക്കാരുടെ മകള്ക്കും മരുമകനും മാതാപിതാക്കള്ക്കും കോവിഡ് സ്ഥിരീകരിച്ചു. നാലുപേരും കോട്ടയം മെഡിക്കല് കോളജ് ആശുപത്രിയില് ചികില്സയിലാണ്. സംസ്ഥാനത്ത് ആകെ 12 പേരില് കൊറോണ വൈറസ് സ്ഥിരീകരിച്ചു. ഇറ്റലില് നിന്ന് പത്തനംതിട്ട റാന്നിയിലെത്തിയ ശേഷം കോവിഡ് 19 സ്ഥിരീകരിച്ച മൂന്നംഗ കുടുംബത്തോട് അടുത്ത് ഇടപഴകിയ ആറുപേര്ക്കാണ് രോഗം വന്നത്. കൊച്ചി വിമാനത്താവളത്തില് നിന്ന് ഇവരെ കൂട്ടിക്കൊണ്ടു വരാന് പോയ കോട്ടയത്തുകാരായ രണ്ട് ബന്ധുക്കള്ക്ക് കോവിഡ് 19 പിടിപെട്ടു. പത്തനംതിട്ടയില് താമസിക്കുന്ന വൃദ്ധമാതാപിതാക്കള്ക്കും ഇറ്റലിയില് നിന്ന് എത്തിയവരില് നിന്ന് രോഗം പകര്ന്നിട്ടുണ്ട്. ഇവരുടെ പ്രായവും ആരോഗ്യസ്ഥിതിയും കണക്കിലെടുത്ത് കോട്ടയം മെഡിക്കല്കോളജിലാക്കി.
റാന്നിയില് തന്നെയുള്ള രണ്ട് ബന്ധുക്കളെ ഈ കുടുംബം സന്ദര്ശിച്ചിരുന്നു. അവര്ക്കും രോഗം ബാധിച്ചു. ഇവര് കോഴഞ്ചേരി ആശുപത്രിയില് ചികിത്സയിലാണ്. രോഗബാധിതരില് മൂന്നംഗ കുടുംബവും കൊച്ചിലെത്തിയ കുട്ടിയടക്കം നാലുപേര് ഇറ്റലിയില് നിന്ന് വന്നവരും ബാക്കി എട്ടുപേര് അവരുമായി ബന്ധം പുലര്ത്തിയവരുമാണ്. ഇന്നു പുതുതായി 6 പേര്ക്കാണ് രോഗം സ്ഥിരീകരിച്ചത്. 1,116 പേര് നിരീക്ഷണത്തിലാണ്. ഇതില് 149 പേര് ആശുപത്രിയിലും 967 പേര് വീടുകളിലുമാണ് നിരീക്ഷണത്തിലുളളതെന്ന് മുഖ്യമന്ത്രി പിണറായി വിജയന് അറിയിച്ചു. 807 സാംപിളുകള് പരിശോധയ്ക്ക് അയച്ചു. ഇതില് 717 എണ്ണത്തിന്റെ ഫലം നെഗറ്റീവാണ്. ബാക്കിയുളളവ വരാനുണ്ടെന്നും മുഖ്യമന്ത്രി പറഞ്ഞു.
