ത്രിപുര : പശുമോഷണം ആരോപിച്ച് ത്രിപുരയില് യുവാവിനെ തല്ലിക്കൊന്നു. ബംഗാള് സ്വദേശിയായ യുവാവാണ് കൊല്ലപ്പെട്ടത്. പശുവിനെ മോഷ്ടിക്കാനെത്തിയ മൂവര് സംഘത്തില്പ്പെട്ടയാളാന്നെന്ന് ആരോപിച്ചാണ് നാട്ടുകാര് യുവാവിനെ തല്ലിക്കൊന്നത്. സംഭവത്തില് ത്രിപുര പോലിസ് അന്വേഷണം ആരംഭിച്ചു. ത്രിപുരയിലെ അഗര്ത്തലയിലാണ് പശുവിനെ മോഷ്ടിച്ചെന്ന് ആരോപിച്ച് യുവാവിനെ ആള്ക്കൂട്ടം തല്ലിക്കൊന്നത്. ബംഗ്ലാദേശില് നിന്ന് പശുവിനെ മോഷ്ടിക്കാന് എത്തിയതാണ് ഇയാളെന്ന് ആരോപിച്ചാണ് ആള്ക്കൂട്ടം മര്ദിച്ചത്.
വെള്ളിയാഴ്ച രാത്രി ത്രിപുരയിലെ ലിറ്റന് പോള് പ്രദേശത്ത് ബംഗ്ലാദേശില് നിന്നുള്ള മൂന്ന് യുവാക്കള് പശുവിനെ മോഷ്ടിക്കാന് എത്തിയിരുന്നെന്ന് പ്രദേശവാസികള് പറഞ്ഞു. മോഷണത്തിനായി 3 പേര് ഒരു വീട്ടില് കയറിയിരുന്നെന്നും പ്രദേശ വാസികള് ആരോപിച്ചു. മോഷണ ശ്രമത്തിനിടെ അയല്വാസിയുടെ സഹായത്തോടെ ഗൃഹനാഥന് ഇവരെ പിടികൂടുകയായിരുന്നു. എന്നാല് രണ്ട് പേര് ഓടി രക്ഷപ്പെട്ടു. കൈയില് കിട്ടിയയാളെ പ്രദേശവാസികള് ചേര്ന്ന് ആക്രമിച്ച് കൊലപ്പെടുത്തുകയായിരുന്നു.