ഡല്ഹി: ഡല്ഹി കലാപത്തിനിടെ പള്ളി കത്തിച്ച സംഭവത്തില് കേസെടുക്കാന് കോടതി ഉത്തരവ്. ഡല്ഹി മെട്രോപൊളിറ്റന് മജിസ്ട്രേറ്റ് കോടതിയാണ് ഉത്തരവിട്ടത്. കഴിഞ്ഞ വര്ഷം നടന്ന കലാപത്തിനിടെ ശിവ് വിഹാറിലെ മദീന മസ്ജിദ് കത്തിച്ച സംഭവത്തിലാണ് കോടതി നടപടി. അഡീഷണല് ചീഫ് മെട്രോപൊളിറ്റന് മജിസ്ട്രേറ്റ് മയൂരി സിങ് ഡല്ഹി, കാരവാല് നഗര് പോലീസ് സ്റ്റേഷനിലെ എസ്.എച്ച്.ഒയ്ക്ക് എഫ്.ഐ.ആര് രജിസ്റ്റര് ചെയ്യാന് നിര്ദേശം നല്കി.
പള്ളി കത്തിച്ചതില് കൃത്യമായ തെളിവുണ്ടെന്ന് ചൂണ്ടിക്കാട്ടിയാണ് കോടതി നടപടി. അഡ്വ. എം.ആര്. ഷംഷാദ് സമര്പ്പിച്ച അപേക്ഷയിലാണ് ഉത്തരവ്. 2020 ഫെബ്രുവരി 25ന് വൈകുന്നേരം ആറോടെ മദീന മസ്ജിദ് പരിസരത്ത് 20 മുതല് 25 വരെ ആളുകള് തടിച്ചുകൂടിയതായി പരാതിയില് പറയുന്നു. രണ്ട് എല്പിജി സിലിണ്ടറുകളിലൂടെ നടത്തിയ സ്ഫോടനത്തിന്റെ സഹായത്തോടെയാണ് പ്രതികള് പള്ളി തകര്ക്കുകയും തീ കത്തിച്ച് നശിപ്പിക്കുകയും ചെയ്തത്.
ഫെബ്രുവരി 26ന് പ്രതികളിലൊരാള് മസ്ജിദിന് മുകളില് കയറി ജയ് ശ്രീ രാമനെ വിളിക്കുകയും തുടര്ന്ന് മസ്ജിദിന് മുകളില് കാവി പതാക ഉയര്ത്തുകയും ചെയ്തുവെന്നും പരാതിയില് പറയുന്നു. പ്രതികളുടെ പേരുകള് ഉള്പ്പടെ പരാമര്ശിച്ച് നല്കിയ പരാതിയില് പോലീസ് നടപടി എടുക്കാത്തതെന്തെന്ന് കോടതി ചോദിച്ചു. ആവശ്യമായ വകുപ്പുകള് പ്രകാരം കേസ് എടുക്കാനും നിര്ദേശിച്ചിട്ടുണ്ട്.
