ന്യൂഡൽഹി : ഇന്ത്യയിൽ ആദ്യമായി ഡെങ്കിപ്പനി വാക്സീന് ഡ്രഗ് കൺട്രോളർ ജനറൽ ഓഫ് ഇന്ത്യ അനുമതി നൽകി. 4 മുതൽ 60 വയസ്സുവരെയുള്ളവർക്ക് ക്യുഡെൻഗ (QDENGA:TAK-003) വാക്സീനാണ് അനുമതി നൽകിയത്. 2027 ന്റെ ആദ്യ പകുതിയിൽ ക്യുഡെൻഗ ഇന്ത്യയിൽ ലഭ്യമാകുമെന്നാണ് കമ്പനി അറിയിച്ചത്. വിപണന അനുമതി ലഭിച്ച ശേഷം തുടക്കത്തിൽ സ്വകാര്യ ആശുപത്രികളിലൂടെയാണ് വാക്സിൻ നൽകുക. ജപ്പാൻ കമ്പനിയായ തകെഡ ബയോഫാർമസ്യൂട്ടിക്കൽസിന്റേതാണു ക്യുഡെൻഗ. ഹൈദരാബാദ് ആസ്ഥാനമായ ബയോളജിക്കൽ ഇ ഫാർമ കമ്പനിയുമായി ചേർന്നാണ് ഇന്ത്യയിലെ നിർമാണം.
2030 ആകുമ്പോഴേക്കും പ്രതിവർഷം 10 കോടി ഡോസ് ഉത്പാദിപ്പിക്കുക എന്നതാണ് ലക്ഷ്യം. ഇതിൽ ബയോളജിക്കൽ ഇയുടെ സഹായത്തോടെ 5 കോടി ഡോസ് വരെ ഉത്പാദിപ്പിക്കാനാണ് പദ്ധതി. 6,000– 12,000 രൂപയ്ക്കു വിപണിയിലെത്തിക്കുമെന്നാണു കമ്പനി അറിയിപ്പ്.
