കൊച്ചി : നടിയെ ആക്രമിച്ച കേസിലെ അന്വേഷണ ഉദ്യോഗസ്ഥരെ കൊലപ്പെടുത്താന് ഗൂഡാലോചന നടത്തിയ കേസില് പ്രതി ദിലീപിന് തിരിച്ചടി നല്കിക്കൊണ്ട് എഫ്ഐആര് റദ്ദാക്കണമെന്ന ഹര്ജി കഴിഞ്ഞ ദിവസമാണ് ഹൈക്കോടതി തള്ളിയത്. ഹൈക്കോടതി സിംഗിള് ബെഞ്ചിന്റേതായിരുന്നു വിധി. ജസ്റ്റിസ് സിയാദ് റഹ്മാനാണ് ഹര്ജി തള്ളിയത്. എന്നാല് ഹൈക്കോടതി വിധിക്കെതിരെ അപ്പീല് നല്കണമോയെന്ന നിയമോപദേശം തേടിയിരിക്കുകയാണ് ദിലീപ്. മുതിര്ന്ന അഭിഭാഷകന് മുകുള് റോത്തഗിയില് നിന്നാണ് ദിലീപ് നിയമോപദേശം തേടിയത്. അപ്പീല് നല്കിയാല് കാലതാമസം ഉണ്ടാകുമോയെന്നും പരിശോധിക്കും.
എന്നാല് വധഗൂഢാലോചന കേസില് ദിലീപിനെതിരായ അന്വേഷണം ക്രൈംബ്രാഞ്ച് തുടരുന്നത് ദിലീപിനെ സംബന്ധിച്ച് അത്ര നല്ലതല്ല. നടിയെ ആക്രമിച്ച കേസിലെ അന്വേഷണ ഉദ്യോഗസ്ഥരെ ആപായപ്പെടുത്താന് ദിലീപും ബന്ധുക്കളും ഗൂഡാലോചന നടത്തിയെന്ന കേസിനെ കേന്ദ്രീകരിച്ചാണ് നടിയെ ആക്രമിച്ച കേസിലെ തുടരന്വേഷണവും ഇപ്പോള് നടക്കുന്നത്. നിലവില് മുന്കൂര് ജാമ്യത്തില് കഴിയുന്ന ദിലീപിന് നിലവിലെ വിധി പ്രതിസന്ധിയാകും. ദിലീപിനെ കസ്റ്റഡിയിലെടുത്ത് ചോദ്യം ചെയ്യുന്നതിലേക്ക് അടക്കം അന്വേഷണ സംഘത്തിന് ഇനി കടക്കാന് സാധിക്കും.
ആദ്യ ഘട്ടത്തില് പ്രോസിക്യൂഷന്റെ ഭാഗത്ത് ഉണ്ടായിരുന്നത് ബാലചന്ദ്രകുമാറിന്റെ മൊഴി മാത്രമാണ് ഉണ്ടായിരുന്നത്. അതിന് ശേഷം കേസിലെ നിര്ണായകമാ ഫോണ് പോലും ലഭിക്കുന്നത് വലിയ നിയമപോരാട്ടത്തിനൊടുവിലാണ്. അതുകൊണ്ട് തന്നെയാണ് ദിലീപിന്റെ മുന്കൂര് ജാമ്യം പരിഗണിച്ചപ്പോള് പ്രോസിക്യൂഷന് തിരിച്ചടി നേരിട്ടത്. എന്നാല് അതിന് ശേഷം പ്രോസിക്യൂഷന് ഉണര്ന്ന് പ്രവര്ത്തിച്ചു. തെളിവ് നശിപ്പിക്കല് അടക്കമുള്ള കാര്യങ്ങള് സായ് ശങ്കര് മൊഴിയായി നല്കിയതോടെ ദിലീപിനെതിരായ കേസ് കൂടുതല് ശക്തമായി. ഇത് കൂടി പരിഗണിച്ചാണ് ഹൈക്കോടതി എഫ്ഐആര് റദ്ദാക്കണമെന്ന ഹര്ജി കോടതി തള്ളിയത്.
നടന് ദിലീപിന്റെ ജാമ്യം റദ്ദാക്കണമെന്ന ഹര്ജി വിചാരണ കോടതി ഈ മാസം 26 ന് പരിഗണിക്കാന് മാറ്റി. ഇക്കാര്യത്തില് ദിലീപിന്റെ മറുപടി സത്യവാങ്മൂലം അന്ന് ഫയല് ചെയ്യണം. എന്നാല് ഹര്ജിയില് ക്രൈംബ്രാഞ്ച് മുദ്രവെച്ച കവറില് തെളിവുകള് കൈമാറിയിരിക്കുകയാണ്. ദിലീപ് ജാമ്യവ്യവസ്ഥകള് ലംഘിച്ചെന്ന് കാണിച്ചാണ് ക്രൈംബ്രാഞ്ചിന്റെ ഹര്ജി. സാക്ഷികളെ സ്വാധീനിക്കാനും തെളിവുകള് നശിപ്പിക്കാനും ദിലീപ് ശ്രമിച്ചതിന് തെളിവുകള് ഉണ്ടെന്നു ഹര്ജിയില് അന്വേഷണസംഘം പറയുന്നു. ദിലീപ് ഉള്പ്പെട്ട വധഗൂഢാലോചന കേസില് അന്വേഷണ സംഘം യോഗം ചേരുകയാണ്. നടിയെ ആക്രമിച്ച കേസിലെ ഉദ്യോഗസ്ഥരും യോഗത്തില് പങ്കെടുക്കുന്നുണ്ട്.
ക്രൈംബ്രാഞ്ച് മേധാവി എസ് ശ്രീജിത്തിന്റെ നേതൃത്വത്തിലാണ് യോഗം ചേരുന്നത്. നേരത്തെ ജിന്സണ്, വിപിന്ലാല് എന്നീ സാക്ഷികളെ സ്വാധീനിക്കാന് ശ്രമിച്ചതിന് പീച്ചി പോലീസും ബേക്കല് പോലീസും രജിസ്റ്റര് ചെയ്ത കേസുകള് ചൂണ്ടികാട്ടി ദിലീപിന്റെ ജാമ്യം റദ്ദാക്കാന് അന്വേഷണസംഘം ശ്രമിച്ചെങ്കിലും കോടതി അനുവദിച്ചിരുന്നില്ല. മതിയായ തെളിവുകളില്ലെന്ന് ചൂണ്ടിക്കാട്ടി കോടതി ആ ആവശ്യം നിരാകരിക്കുകയായിരുന്നു. എന്നാല് തുടര് അന്വേഷണത്തില് ദിലീപ് ജാമ്യം വ്യവസ്ഥ ലംഘിച്ചതിന്റ നിരവധി തെളിവുകള് ലഭിച്ചെന്ന് അന്വേഷണ സംഘം ചൂണ്ടികാട്ടുന്നു.
