അരൂര് : അരൂർ ഗ്രാമപഞ്ചായത്ത് പത്താം വാര്ഡില് പാലേക്കാട്ട് കളം ബിനുവിന്റെ താറാവുകൃഷിക്കളത്തില് തെരുവ്നായ്ക്കള് മുന്നൂറോളം താറാവുകളെ കടിച്ചു കൊന്നു. വിനുവിന്റെ വീടിന് അകലെയാണ് താറാവുകളെ വളര്ത്തുന്നത്. അതുകൊണ്ട് താറാവിനെ ആക്രമിച്ചപ്പോള് ശബ്ദം കേള്ക്കാന് കഴിഞ്ഞില്ല. പുലര്ച്ചെ താറാവുകളെ നോക്കാന് ചെന്നപ്പോഴാണ് നായ്ക്കള് അക്രമം നടത്തിയത് അറിയുന്നത്. ബാങ്കില് നിന്ന് വായ്പ എടുത്താണ് താറാവ് കൃഷി നടത്തിയിരുന്നതെന്ന് ബിനു പറഞ്ഞു. സമീപത്തുള്ള മറ്റു താറാവ് വളര്ത്തു കേന്ദ്രങ്ങളിലും തെരുവുനായ്ക്കളുടെ അക്രമം ഉണ്ടായെങ്കിലും കൂട്ടത്തോടെ നായ്ക്കള് താറാവ് കൂടുകള് പൊളിച്ച് അകത്തു കടന്നപ്പോള് വെള്ളത്തിലിറങ്ങി താറാവുകള് രക്ഷപ്പെടുകയായിരുന്നു.
