മാവേലിക്കര: സ്ത്രീധനം ആവശ്യപ്പെട്ട് യുവതിയെയും രണ്ടു മക്കളെയും വീട്ടുതടങ്കലില് ഭര്തൃവീട്ടുകാര് പീഡിപ്പിച്ചു. പിങ്ക് പോലീസെത്തി യുവതിയെയും മക്കളെയും മോചിപ്പിച്ച് ജില്ലാ ആശുപത്രിയിലാക്കി. ചുനക്കര ലക്ഷംവീട് കോളനിയില് അന്ധനായ കുഞ്ഞുമോന്റെയും സജീദയുടെയും മകള് നിഷ(26)യെയാണ് ഭര്തൃ വീട്ടുകാര് വീട്ടുതടങ്കലില് പീഡിപ്പിച്ചത്. ശരീരമാസകലം മര്ദനമേറ്റ പാടുകളുണ്ട്.
നിഷയുടെ മക്കളായ നിജാ ഫാത്തിമ(ആറ്), മുഹമ്മദ് സല്മാന്(ഒന്ന്) എന്നിവരും വട്ടപ്പാറയിലുള്ള ഭര്തൃവീട്ടില് തടങ്കലിലായിരുന്നു. ഭക്ഷണം പോലും ലഭിക്കാതെ അവശയായ നിഷയെ കഴിഞ്ഞ 10 ന് ഭര്ത്താവും ഭര്തൃമാതാവും ചേര്ന്ന് മര്ദിച്ചു. ഓടി രക്ഷപെട്ട നിഷ റോഡിലെത്തി നാട്ടുകാരോട് വിവരം പറഞ്ഞു. നാട്ടുകാര് അറിയിച്ചതിനെ തുടര്ന്ന് കൊട്ടാരക്കരയില് നിന്നും പിങ്ക് പോലീസെത്തി നിഷയെയും മക്കളെയും രക്ഷപെടുത്തി സ്റ്റേഷനിലേക്ക് കൊണ്ടുപോയി. നാട്ടുകാരും പള്ളിക്കമ്മിറ്റിയും മുന്കൈയെടുത്ത് 2012 ലാണ് നിഷയുടെ വിവാഹം നടത്തിയത്. കൂടുതല് സ്ത്രീധനം ആവശ്യപ്പെട്ടായിരുന്നു ഭര്ത്താവും ഭര്ത്താവിന്റെ അമ്മയും സഹോദരിയും മര്ദിച്ചതെന്ന് നിഷ പറഞ്ഞു. ഭര്ത്താവ് ഓയൂര് പുല്ലാനിപ്പച്ചന ജിയാ മന്സിലില് മുഹമ്മദ് നാജി(30), അമ്മ നദീറ(55), സഹോദരി നജിയ(35) എന്നിവര് ചേര്ന്ന് തന്നെയും കുട്ടികളെയും നിരന്തരം മര്ദിക്കുകയും പട്ടിണിക്കിടുകയും ചെയ്യുമായിരുന്നെന്ന് നിഷ പോലീസിന് നല്കിയ മൊഴിയില് പറയുന്നു.
പോലീസ് വിവരമറിയിച്ചതിനെ തുടര്ന്ന് നിഷയുടെ മാതാപിതാക്കള് മൂവരെയും ചുനക്കരയിലെ വാടക വീട്ടിലേക്ക് കൊണ്ടുപോയി. നിഷയെ പിന്നീട് മാവേലിക്കര ജില്ലാ ആശുപത്രിയില് പ്രവേശിപ്പിച്ചു. കഴിഞ്ഞ ദിവസം പോലീസ് ജില്ലാ ആശുപത്രിയിലെത്തി നിഷയുടെയും മകളുടെയും മൊഴി രേഖപ്പെടുത്തി. 1984 ല് മാവേലിക്കര റെയില്വേ ലെവല്ക്രോസില് വച്ച് ട്രെയിനിടിച്ച് തെറിച്ച് വീണാണ് നിഷയുടെ അച്ഛന് കുഞ്ഞുമോന്റെ കാഴ്ച നഷ്ടപ്പെട്ടത്. ഇതിനു ശേഷം നാട്ടുകാരുടെ കാരുണ്യത്തിലാണ് ഇവര് കഴിഞ്ഞുവന്നത്.
