മല്ലപ്പള്ളി : വാട്ടർ അതോറിറ്റിയുടെ പൈപ്പ് തകർച്ചയെ തുടർന്ന് കുടിവെള്ളം റോഡിലൂടെ ഒഴുകുന്നത് പതിവ് കാഴ്ച. ചുങ്കപ്പാറ – പൊന്തൻപുഴ റോഡിൽ പഴയ തീയേറ്റർ പടിക്ക് സമീപം പൈപ്പ് തകർച്ചയെ തുടർന്ന് ആയിരക്കണക്കിന് ലിറ്റർ വെള്ളമാണ് റോഡിലൂടെ ഒഴുകുന്നത്. ഇവിടെ മാസങ്ങളായി പൈപ്പ് പൊട്ടി വെള്ളം ഒഴുക്ക് തുടങ്ങിയിട്ട്. എന്നാൽ അധികൃതരോട് പരാതിപ്പെട്ടിട്ടും നടപടി ഉണ്ടായിട്ടില്ലെന്ന് നാട്ടുകാർ പറയുന്നു. റോഡിലൂടെ വെള്ളം ഒഴുകുന്നതിനാൽ കാൽനടയാത്രക്ക് ഏറെ ദുരിതമായിരിക്കുകയാണ്. വലിയ വാഹനങ്ങൾ കടന്നുപോകുമ്പോൾ കാൽ നടയാത്രക്കാരുടെ ദേഹത്ത് വെള്ളം തെറിക്കുകയാണ്. പൈപ്പിന്റെ ശോച്യാവസ്ഥക്ക് പരിഹാരം ഉണ്ടാകണമെന്ന ആവശ്യം ഇതോടെ ശക്തമായിരിക്കുകയാണ്.
