ഇ – ശ്രം രജിസ്ട്രേഷന്റെ സ്ഥിരം കൗണ്ടറുകള്‍ പ്രവര്‍ത്തനം ആരംഭിച്ചു

എറണാകുളം : ജില്ലയിലെ കണയന്നൂര്‍ താലൂക്ക് പരിധിയില്‍ വരുന്ന എറണാകുളം ഒന്നാം സര്‍ക്കിള്‍, രണ്ടാം സര്‍ക്കിള്‍ അസിസ്റ്റന്റ് ലേബര്‍ ഓഫീസുകളില്‍ ഇ – ശ്രം രജിസ്ട്രേഷന്റെ സ്ഥിരം കൗണ്ടറുകള്‍ പ്രവര്‍ത്തനം ആരംഭിച്ചു. കാക്കനാട് സിവില്‍ സ്റ്റേഷന്റെ നാലാം നിലയില്‍ പ്രവര്‍ത്തിക്കുന്ന ഓഫീസുകളില്‍ രാവിലെ 10 മണി മുതല്‍ വൈകിട്ട് 5 മണി വരെ രജിസ്ട്രേഷനുള്ള സൗകര്യം ഉണ്ടായിരിക്കുന്നതാണ്. ഇ എസ് ഐ, ഇ പി എഫ് അംഗത്വമില്ലാത്ത 16 നും 59 നും ഇടയില്‍ പ്രായമുള്ള മുഴുവന്‍ അസംഘടിത തൊഴിലാളികള്‍ക്കും ഈ അവസരം പ്രയോജപ്പെടുത്താവുന്നതാണ്. തൊഴിലാളികള്‍ ആധാര്‍ കാര്‍ഡ്, ആധാറുമായി ബന്ധിപ്പിച്ച മൊബൈല്‍ ഫോണ്‍, ബാങ്ക് അക്കൗണ്ട് വിവരങ്ങള്‍ എന്നിവ സഹിതം നേരിട്ട് ഹാജരാകേണ്ടതാണ്.